जायत व्हय ‘चुनाव का पर्व, देश का गर्व’

भांगरभूंय | प्रतिनिधी

मनीस जेन्ना उतरांचे कात्रीत सांपडटा तेन्ना तो नेगार वचपाची दाट शक्यता आसता. आनी म्हूण उमेदवार जेन्ना प्रचाराक उबो रावता तेन्ना ताणे उतरांचे बाण मेजून मापून वापरूंक जाय

हो लेख प्रसिध्दीक येता म्हणसर 2024 लोकसभा वेंचणुकेच्या सात टप्प्या पैकीीं पयल्या दोन टप्प्या मेरेन प्रचार सोंपून मतदान
लेगीत जाल्लें आसतलें. पयल्या टप्प्यात एकवीस राज्यां आनीक दुसर्या टप्प्यात तेरा राज्या आनी केंद्रशासीत प्रदेस मेळून सुमार 191 सुवात्यां खातीर मतदारांनी आपलो कौल दिला आसतलो. आतां मेरेन चलत आयिल्ल्या प्रचारावेल्यान वेंचणुकेंत कोण कोणाचे सख्खे आसनात हें परत एकदां दाखोवन दिलां. एके वटेन उबाळ्या नेट तर दुसरे वटेन वेंचणुकेचें वारें, कोणां कोणांक थकाय दितलें तोय येतलो काळच थारायतलो. मतदानाचे सात टप्पे पुराय जाल्या बगर हें खदूळ वातावरण निवळ नितळ जावची चिन्हां दिसनात. आमी मतदारांनी मात ह्या दुशीत वातावरणांत मन नितळ दवरून, संयम आनी धिटाय बाळगून, विचार करून मतदान करची गरज आसा. आयतार 14 एप्रील 2024 च्या भांगरभूंयेंत ‘विखुरिल्ली पानां’- 50 ह्या सदरा खाला छापून आयिल्लो सुहासिनी प्रभुगांवकार हांचो लेख ‘मनी, मसल, मशीन’ बरोच पेजाद आनीक सामान्य मनशाक देख दिणो असोच थारला हातूंत दुबाव ना. पत्रकारितेंतलो अणभव आनी कुशळटाय तांच्या लेखनांतल्यान आमकां जाणवता. त्या भायर ज्वलंत विशयावेलें तांचे लिखाण अभ्यासपूर्ण आसता घडये हाकाच लागून तें वाचप्यांच्या मनांत रिगता म्हणल्यार म्हजी चूक जावची न्हय. तांचेकडल्यान अशा प्रकारचें लिखाण सातत्यान जावचें अशी आस्त आमी वाचक ह्या नात्यान बाळगूंक हरकत ना. तांचो हो लेख वाचून सामान्य मनशांबराबर राजकरत्यांनी लेगीत बोध घेवंचो अशें म्हाका तांकां नमळायेन सुचोवंचे शें मना सावन दिसता. पुराय देशांत प्रचार तेंगशेर पाविल्लो आसतना गोंय फाटीं कशें उरत. आमच्या गोंयातय वाडट्या तापा वांगडा प्रचाराचोय ताप वाडिल्ल्यान हुमेच्यो पांवळ्यो गळूंक लागल्यात. प्रचारा दरम्यान एक दुसर्याक हातवारे करून आव्हानां दिवपी भाशणांय कानार पडपाक लागल्यांत. तर दुसरेवटेन रुसवे फुगवे करून आपलें काम सादून घेवपी उणे नात. एक मात खरें वेंचणुकेवेळार न्हिदिल्ले लेगीत हडबडून जागे जावन माचयेर बसका घेवन आस्वासनांचो शिंवर करतना पळयतकच अजाप दिसल्या बगर रावना. कसलोय खेळ खेळपाक नेमावळ लागता पूण राजकारण खेळटना सगले नेम धाब्यार बसयिल्ले पळोवंक मेळटा. कोण कोणाक ‘खो’ दिवन आपली सुवात मजबूत करून केन्ना मुखार वचत हें कोणूच सांगूंक शकचो ना. तर कोण कोणाचो इतिहास उस्तून काडून हावको दाखयत हाचोय नेम ना. तरी लेगीत वेंचणुके निमतान एक म्हत्वपूर्ण गजाल घडटा ती म्हणल्यार दरेक राजनितीक पक्ष आनी उमेदवार आप आपलीं उद्दीश्टां लोकामुखार दवरतात. आपले राज्य आनी देस मुखार व्हरपाचो सोपूत घेतात. लोकांक दिल्ली आस्वासना पुराय करतले हें उतर दिवचे खातीर त्या त्या प्रमाण तांचे जाहीरनामे प्रसिध्द जातात. तांची तीं जाहीरनामां पळोवन वेंचणूक जैतीवंत जाल्या उपरांत त्या जाहिरनाम्यांक कोयरा आयदनां दाखयना जाल्यार पुरो. अशे जायते मतदार मेकळेपणान उलयतना कानार पडटा. हाचे कारण घडये कांय जाहीरनामे म्हणल्यार आस्वासनांच्यो फुगोट्योच, पेट्टल्यो काय फूस्स जातल्यो हाचो भरवंसो नासता.
वेंचणूक आयोग मुक्त आनी निश्पक्ष निवडणुक्यो घडोवन हाडचे खातीर बाध्य आशिल्ल्या कारणान आपले परीन काळजी घेवन वेवस्थीत मांडणी आंखून वावराक लागता. हांवे जायते फावटी ‘मतदान केंद्र अध्यक्ष’ म्हूण वावर केल्ल्या कारणान म्हणपाक शकता येद्या व्हड देशांत अशी सुट सुटीत मतदान प्रक्रिया घडोवन हाडप म्हणल्यार एक दिव्यरूप अशें. वेंचणूक प्रक्रिया वेवस्थीत पुराय करचे खातीर मतदारांक शिक्षीत करूंक आयोग बरेच कश्ट घेता. ताचोच भाग म्हूण हे फावटी लेगीत ‘मतदान जागरूकताय’ निर्माण करचे खातीर राश्ट्रीय पांवंड्यार मल्टीमीडिया अभियान ‘चुनाव का पर्व, देश का गर्व’ चालीक लायला. हाचो अर्थ वेंचणूक, सगल्यांत व्हड उत्सव आनी देसाचो अभिमान असो जाता. ह्या अभियाना द्वारा पुराय देशाखातीर वेंचणूक हो व्हडविकाये स्त्रोत म्हूण ताचे म्हत्व पटोवन दिवचे प्रयत्न युध्द पातळेर चालू आसात. मतदारांक आपलो हक आनी जापसालकिचो वापर करूंक सक्षम करचे खातीर हो यत्न लाबदायक थारूं. एक समाजीक जापसालकी म्हूण मतदारानी तशेंच उमेदवारांनीय ह्या धोरणांक पाळो दिवचो आसता. पूण तशें घडना जातकच सादारण मनशांक प्रस्न पडटा हें शिक्षण फकत मतदारांकच उमेदवारांक न्हय काय म्हण आनी मागीर अशा धोरणाचो हांसो जाल्या बगर रावना. ही परिस्थिती येवची न्हय म्हूण राजकीय पक्षानीय काळजी घेवची पडटली.
तशें पळोवंक गेल्यार दर पांच वर्सांनी येवपी ही वेंचणूक कांय मनशां खातीर आपली येणावळ कशीच थारता. कारण ते दरेक उमेदवाराकडल्यान चिरी-मिरी सोडयतात, विचार करिनासतना मतदान करून देशाक धोको दितात. अशें जावचे न्हय म्हूण आमी मतदारांनीय आपूण जवन कोणाच कडल्यान कितेंच घेवचो ना असो निश्चय केल्यार कशें कितें? अजाण मतदारांक तांचे एक मताचे म्हत्व पटोवन दिल्यार असले दिवपा, घेवपाचे प्रकार आळाबंद येवंक शकता इतलें मात खरें. वयर उल्लेख केल्ल्या प्रमाण मनी आनी मसल हें वेंचणुकेचें जरी टॉनीक तरी ताचो वापर सोपेपणी करूंक मेळचो न्हय म्हूण आयोग बरीच खबरदारी घेता. आचारसहितेचो भंग केल्ल्या कारणान गोंयांतल्या विवीध खांत्यांनी कोट्यांनी रुपयांचो म्हाल जप्त केला तें पळयतकच तांणी आव्हान बर्या पैकी पेल्लां म्हूण सिध्द जाता.
मनीस जेन्ना उतरांचे कात्रीत सांपडटा तेन्ना तो नेगार वचपाची दाट शक्यता आसता. आनी म्हूण उमेदवार जेन्ना प्रचाराक उबो रावता तेन्ना ताणे उतरांचे बाण मेजून मापून वापरूंक जाय कारण ते बाण केन्ना कोणांक घायाळ करीत हेंय सांगपाक कठीण. राजकीय पक्षानी आनी उमेदवारांनी भावनीक ताण निर्माण जावचो न्हय म्हूण आपल्याचेर कांय बंधना घालून प्रचार केल्यार थंड पणान वेंणुको पार पडूंक मजत जावंक शकता. देखून कठीण परिस्थितींत मनाचो ताबो सुटूंक दिनासतना, कसल्याच हांयसाक बळी पडनासतना मतदान करून चुनाव का पर्व, देश का गर्व खरें पणान चालीक लावचो यत्न आमी करूंक जाय. पेलूंक शकतले व्हय हो म्हत्वपूर्ण कर्तव्या भार.

एच. मनोज
9822441417