भांगरभूंय | प्रतिनिधी
अशे तरेन शर्मिला, जेन, नेहा, शांती, मायरा, फरिदा हीं त्या खुन्याच्या भकीक पडटात. तांचे बराबर कांय निश्पाप लोकांचेय खून जातात.
कोंकणींत ‘रोमांश’ हो खुब गाजिल्लो प्रकार आशिल्लो, ताका आयज कादंबरी म्हण वळखतात. ह्या प्रकारांत मोगाचेर आदारीत कथानकां आसतालीं. रेजिनाल्द फेर्नांदीस सारक्या फांकी रोमांशीकारान ह्या प्रकाराक उभारी हाडली. दोनशीं वयर रोमांशी बरयल्ल्या रेजिनाल्दाक आयज ‘रोमांशीचो पातशाय’ म्हण वळखतात, ताणें वेग-वेगळ्या तरांच्यो कादंबरी बरयल्यो, तातूंतल्या चडावंत गुपीत कथानकांक मागणी आशिल्ली. हेरूय बरोवप्यांनी रहस्यमय बरपां केलीं आनी ह्या क्षेत्रांत बरेंच नांव दवरलें. हालींच्या काळार कथा येतात तातूंत व्हडलें- शें रहस्य आसना. असले प्रकार हाताळुकूंय कोण सोदिना. हाका वेगळीं कारणां आसूं येतात, पूण रोमांशींतल्या रहस्यमय बरपान जायते वाचपी जोडून घेतिल्ले. उतार पिरायेर पाविल्ले वाचक आजुनूय असलीं बरपां सोदतात. अशेच फाटभुंयेर कोंकणींतलो एक खांपो बरोवपी रूय कुयेल्हो हाणें रहस्यमय कादंबरी बरवपाचो यत्न केलो आनी ‘नाक्ष्यो’ ही कादंबरी वाचकांक दिली. तिका 101 पानां आसात आनी तिचें मोल फकत 150/- रुपया आसा. तिचें मुखचीत्र बरोवप्यान स्वता काडलां आनी ती रूय आलेक्स कुयेल्हो प्रकाशनान उजवाडायल्या. कव्हराच्या फाटल्या पानाचेर बरोवप्याची थोडी वळख दिल्या. पुस्तकाक 27 अध्याय आसात. ल्हान पूण गुपीत घडण्यांनी मांडून हाडिल्ल्या कथानका खातीर रूय कुयेल्होक परबीं आनी शाबासकी.
फाटभूंय
रूय कुयेल्होची ही चवथी कादंबरी, तातूंत कितें तरी रहस्यमय हाडूंक ताणें चिंतलें. ताका दिसता, कोणूय कादंबरी वाचूंक बसलो जाल्यार तो तातूंत मिसळ जावंक जाय आनी वाचप्याचें ध्यान- मन सगळेंच काणयेचेर आसूंक जाय. आपूण कितें तरी बरें वाचतां आनी काळजांतल्यान खुशाल जाता म्हण ताणें अणभवूंक गरज. नाक्ष्यो कादंबरींत काणी वेगळीच आसा आनी जर कोणें हें पुस्तक वाचूंक हातांत घेतलें जाल्यार तें काबार जायसर ताका सूख लागचें ना, ह्या हेतून बरोवप्यान तातूंत रहस्याचो भरपूर पावस घाला.
कथानक
‘नाक्ष्यो’ कादंबरीचें कथानक दूसऱ्या भागांतल्यान सुरू जाता. पयल्या भागांत मुंबय शारांतल्या मुक्तनगरची वळख दिले उपरांत सोबीत चेडवां अकस्मात ना जातात, ताचे गुपीत वाचूंक मेळटा. सुरवातेक दोतोरपणाचें शिकप केल्लें फिज्जा गूढ रितीन गायब जाता. चार ट्रक ड्रायव्हर ताका धरून व्हरतात आनी रानांत व्हरून ताचेर बलात्कार करपाच्या यत्नांत आसतना, बल्तोच कोण तरी एक भिरांकूळ मनीस येता आनी त्या चारूय ड्रायव्हरांक मारून फिज्जाचेर ताबो घेता. तें आदींच बेशुद्ध अवस्थेंत आशिल्लें, त्या ट्रक ड्रायव्हरांनी ताका विंगळें केल्लें, तरी तो भिरांकूळ मनीस दोतोराच्याच बेगांतलीं बेशुद्ध जावपाचीं इंजेक्शनां काडून ताका तोपता आनी ताच्यो नाक्ष्यो काडून व्हरता. ताचेर बलात्कार करीना हें अजाप. कोण जायत तो? मुखार रेतिराक आयल्लें मारियोला आपलो जीव घमयता आनी तो खुनी ताच्यो नाक्ष्यो काडून व्हरता. अशे तरेन शर्मिला, जेन, नेहा, शांती, मायरा, फरिदा हीं त्या खुन्याच्या भकीक पडटात. तांचे बराबर कांय निश्पाप लोकांचेय खून जातात. सुंदर चेडवांच्यो नाक्ष्योच गायब जातात ही पुलिसांची लेगीत डोकेदुखी जाता. ते तपास करतात पूण तांकां यश मेळना. त्या दोंगराचेर असल्यो आजनेरी जातात म्हण पुलीस रेतीर करपाचें बंद करूंक फर्मायतात आनी रेतीर- घरांत सेवा दिवंक आशिल्ल्या माद्रिंचें स्थलांतरण करतात. पुलीस आपलो पाहरो कडक करतात आनी ड्रोना वरवीं पाळत दवरूंक लागतात.
भास
पुस्तकांतली भास सादी आनी सोंपी आसा. आपल्या वाचपी साहित्याचो आस्वाद घेतले हे तरेन बरोवप्यान ती बरयल्या. कांय वर्णनां सुंदर जाल्यांत. भाशेची मांडावळ आनी पात्रां नेटोवपाचीं उतरां बेस-बरीं जाल्यांत. कांय घडण्याचें चित्रणूय बरें जालां. सुडसुडीत भाशेक लागून कादंबरी उठून येता.
पात्रां
कादंबरींत खूब पात्रां आसात. दर दुसऱ्या अध्यायांत वेग-वेगळें पात्र पळेवंक मेळटा. पयल्या अध्यायांत मुंबयच्या मुक्तनगर वाड्यांत रावपी रुजारियो गोन्साल्वीस आनी ताच्या कुटुंबाची खबर वाचूंक मेळटा. मागीर धा वर्सां बंदखणींत रावून सुटून आयिल्ल्या मॅथीवाची गजाल येता. ह्या मॅथीवाची रुजारीक सदांच भिरात दिसता. जोयल नांवांचो एक गुंडा कथानकांत येता जो फकत दुसऱ्यांचें पाड घालता. थंयंच आशिल्ल्या उड्डान पुला पोंदा सरदार नांवाचो एक क्रिस्तांव मनीस रावता. तो जाण्टो जाल्लो आनी साबार वर्सां जालीं तो भीक मागून जियेता. ताचें खरें घर मुंबयचे शिमेर आशिल्लें. ताच्या घरा कडेनूच एक रेतीर घर जाल्लें जंय वेग-वेगळ्या जाग्यां वेल्यान, गोंयच्यान लेगीत लोक रेतीराक येतालो. ह्या रेतीराक वांटो घेतिल्लीं साबार पात्रां कथानकाची सांखळ जातात. सोबीत चेडवां कथानकाच्या गुपितांत बुडून वतात जांच्यो नाक्ष्यो ना जातात आनी कोणाचो खुनूय जाता. पात्रांक बेस- बरे तरेन बरोवप्यान रहस्य्मय रितीन हाताळ्ळ्यांत.
खाशेलेपण
कादंबरीच्या कथानकाचें खाशेलेपण म्हळ्यार पात्रांची मांडावळ, वातावरण निर्मिती आनी गूढ रितीन जावपी घडणुको. निमाणो अध्याय मेरेन कोण खुनी आनी कोण ह्या सोबीत चेडवांच्यो नाक्ष्यो काडून व्हरता तें कळना. मुखेल पात्र रुजारियो हातूंत घुस्पल्लो आसा अशें दिसता, थंयच जोयलाचीं कारस्थानां फुडें येतात. मदेंच मॅथीव भुमिकेंत येता. लुटमार करपी आनी चेडवांचेर आगळीक करपी हेर लोक दिश्टी पडटात. थोडे भांगार-दुडवां निमतान चेडवांक सतायतात जाल्यार थोडे मोगाच्या प्रकरणांत घुस्पल्ले आसतात. कादंबरींत कितले निश्पाप जीव वतात आनी एकलोच ताचो आनंद भोगता. मुक्तनगरचो दोंगोर बरो चित्रायला. पुलीस सुरवातेक बेजबाबदार कशे पूण निमाणे कडें नाक्ष्यांची केस सुटावी करतात. नाक्ष्यो काडपी खरो शेवटाक पुलिसांच्या ताब्यांत पडटा आनी तो कित्या खातीर त्यो नाक्ष्यो काडटालो हें स्पश्ट करता, कोण तो? हांगा वाचप्यां खातीर रहस्य दवरतां.
सोंपयतना…
जायते पावटीं वाचप्यांचे मागणे प्रमाणें बरप जाता पूण कांय फावटीं एक बरोवपी आपणाक जायतें वाचप्यांक दिवपाचें धाडस करता. रूय कुयेल्होन लोकाक मानतले ते धरतेचेर आदारीत कथानकाचो वापर करून कादंबरीचें बीज तयार केलें आनी आयच्या वाचप्या मुखार तें दवरलें. आयच्या वाचप्यांक तें कितलें मानवतलें तें खबर ना, पूण एक नवो प्रकार रुयान कोंकणी सरस्पतींत भरशिलो. हे आदीं ताचीं जायतीं पुस्तकां आयल्यांत ते खातीर ताची तोखणाय करचीच पडटली. ह्या वेळार ताचे कडें इतलेंच मागन, ताणें साहित्यीक मळार अशेंच वेगळेपण हाडूंक वावरचें आनी कोंकणी भाशेची गिरेस्तकाय वाडोवंची. ताचे कडल्यान साहित्याची भरपूर सेवा जावंची हीय अपेक्षा.
– विन्सी क्वाद्रूस,
९८२२५८७४९८
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
