भांगरभूंय | प्रतिनिधी
-भाजपा कडल्यान प्रचाराक गती, आरजीपी, ‘इंडी’ चो मात नेट दिसना
पणजीः लोकसभा वेंचणुकेंत गोंयच्या मतदानाक फकत पांच दीस उरल्यात. देखून वेंचणुकेच्या मळार भाजपा, काँग्रेस आनी क्रांतीकारी गोवन ह्या तिनूय पक्षांनी प्रचाराचेर भर दिवपाक सुरवात केल्या. हाका लागून राज्यांतलें राजकी वातावरणूय तापपाक लागलां.
भाजपान हे खेपे देशभरांत चारशें नारे दिल्यात. भाजपाचे राष्ट्रीय आनी थळावे फुडारी हेच दिशेन प्रचार करतात. गोंयांतल्यो दोनूय सुवाती जिखपाच्या निश्चयान मुख्यमंत्री प्रमोद सावंत आनी भाजपाचे प्रदेश अध्यक्ष सदानंद शेट तनावाडे हांणी मगो आनी एनडीए युतींतल्या अपक्ष आमदारां सयत दोनूय मतदारसंघांतल्या भाजपा उमेदवारांच्या प्रचाराक गती दिल्या. फाटल्या कांय दिसांनी मुख्यमंत्री, राज्य अध्यक्ष आनी दोनूय उमेदवार चड करून सगळ्या मतदारसंघांनी पावपाक येसस्वी जाल्यात. मंत्री तशेंच आमदारांनी आपापल्या मतदारसंघांत घरांघरांनी प्रचार करपाचेर भर दिला. भाजपाच्या स्टार प्रचारकां मदीं हालींच प्रधानमंत्री नरेंद्र मोदीची बसका जाल्या आनी केंद्रीय गृह मंत्री अमीत शाह हांची बसका 3 मे दिसा म्हापश्यां जातली. ते उपरांत हेर बसकाय जातली.
दुसरे वटेन हे खेपे पयलेच खेपे लोकसभेची वेंचणूक लडोवपी आरजीपीच्या कार्यकर्त्यांनीय गांवांनी वचून प्रचार करपाचेर भर दिला. आरजीपीचे उत्तर गोंयचे उमेदवार मनोज परब आनी दक्षीण गोंयचे उमेदवार रुबर्ट परेरा हांचो घरांघरांनी प्रचार करपाक सुरवात केल्या. उरिल्ल्या पांच दिसांनी आपली मोहीम खर करून दोनूय सुवातो जिखून इतिहास रचपाचो आरजीपीचो निश्चेव आसा.
………………………………………..
बॉक्स
काँग्रेसीच्या प्रचारांत दम ना
– भाजपा आनी आरजीपी हांचो प्रचार चालू आसतना मुखेल विरोधी पक्ष काँग्रेसीची प्रचारांत दम नाशिल्ल्याचे दिसून येता.
– काँग्रेस आनी इंडी आघाडीचे फुडारी, काँग्रेसीचे प्रदेश अध्यक्ष अमीत पाटकार, विरोधी फुडारी युरी आलेमांव, आमदार एल्टन डिकोस्ता आनी गोवा फॉरवर्ड अध्यक्ष आनी आमदार विजय सरदेसाय सोडून हेर पक्षांचे कार्यकर्ते मुखेल उमेदवारांच्या प्रचारांत दिसनात.
– उत्तर गोंयचो उमेदवार रमाकांत खलप आनी दक्षीण गोंयचो उमेदवार विरियातो फर्नांडीस फकत थोड्याच कार्यकर्त्यां सयत प्रचार करतात, देखून कितलेशेच लोक अजाप उक्तायतात.
– प्रधानमंत्री मोदीचे बसकेक लागून भाजपान स्टार प्रचारकांची बसका सुरू केली. पूण दिल्ली आनी हेर राज्यांतले व्हड फुडारी काँग्रेसीच्या उमेदवारांचो प्रचार करपाक येवचे नात असो सस्पेन्स अजूनय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
