भांगरभूंय | प्रतिनिधी
पणजी, बातमीदार: सध्या राज्यांतली खरसाण सोंसपा भायली जावपाक लागल्या. फुडल्या सात दिसांनी तापमान ३४ ते ३६ अंश सेल्सियस मदीं उरतलें असो अदमास हवामान खात्यान उक्तायला. जाल्यार फुडले दोन दीस तापमान १ ते २ डिग्री सेल्सियस वाडपाची शक्यताय आसा. १ ते ३ मे मजगतीं वातावरण उश्ण आनी दमट उरतलें असोय अदमास हवामान खात्यान उक्तायला.
खात्यान दिल्ले म्हायती प्रमाण, मंगळारा राज्यांतलें तापमान ३३ ते ३५ अंश सेल्सियस मदीं आसलें. बुधवारा मुरगांवांत चडांत चड तापमान ३४.४ डिग्री सेल्सियस आनी उण्यांत उणें २७.७ डिग्री सेल्सियस तापमानाची नोंद जाल्या. जाल्यार पणजेचें चडांत चड तापमान ३४.३ अंश सेल्सिअस जाल्लें. पणजेचें उण्यांत उणें तापमान सामान्य उण्यात उण्या तापमाना परस १.२ अंश सेल्सिअसान वाडून २७.५ अंश सेल्सिअस जाल्लें. हवामान खात्यान १ ते ७ मे मजगतीं राज्यांतलें वातावरण सुकें उरपाची शक्यताय उक्तायल्या.
मजगतीं हिट इंडेक्स म्हळ्यार जाणवपी तापमान ४० अंश सेल्सिअसा परस उणें उरपाची शक्यताय आसा. तशेंच फुडले सात दीस राज्यांतली आर्द्रताय आनी वार्याच्या वेगांत बदल जावपाची शक्यताय ना. जाल्यार आयज आनी फाल्यां राज्यांतलें वातावरण दमट आसपाची शक्यताय खात्यान उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
