भांगरभूंय | प्रतिनिधी
पणजी, बातमीदार : फाटलीं आठ वर्सां हांवें भाजप आनी संघाचें खंयचेंय काम मना पसून केलां. हांवें कॉंग्रेस सोडून भाजपांत येवपाचो निर्णय घेतले उपरांत प्रधानमंत्री नरेंद्र मोदी हांची भेट घेतली. तेन्ना सावन हांवें भाजप आनी राष्ट्रीय स्वयंसेवक संघाची (RSS) विचारधारा मनापसून स्विकारली. तेन्नाच्यान म्हज्या मनांत कॉंग्रेस हो विचार पसून येना, अशें भलायकी मंत्री विश्वजीत राणे हांणी आयज पणजे जाल्ले पत्रकार परिशदेंत सांगलें.
म्हज्या मतदासंघां सयत हेर सुवातांनी लेगीत हांवें हिंदू, क्रिस्तांव तशेंच मुस्लीम समाजाक फाटबळ दिलां. भाजप फक्त मनीसपणान आनी समाजकारण म्हणून राजकारण करता. आमी समाजाक तोडपाचें काम केन्नाच करिनात, अशें मंत्री राणे हांणी म्हणलें.
जेन्ना आमी राष्ट्रीय पांवड्यावेले कोअर समितीचे बसकेंत आसतात तेन्ना प्रधानमंत्री आमकां, ‘तुमी खंयच्या समाजाच्या उत्सवाक हाजीर राविल्ले?’, हें विचारतात. तुमी इगर्जेचे कार्यावळीक गेल्ले? अशेंय ते विचारतात. विवीध समाजाचे कार्यावळींनी मुद्दाम हाजीर रावात, असो तांचो सामको आग्रो आसता अशें तांणी म्हणलें.
हांव स्वता प्रधानमंत्री नरेंद्र मोदी, अमित शहा आनी भाजपाची विचारधारा घेवनूच लोकां मदीं वतां. आमकां सगळ्या समाजांतल्या लोकांचें फाटबळ जाय. दर वर्सा हांव कार्डिनल फिलीप नेरी फेर्रांव हांकां भेट दितां. कार्डिनल हांकां प्रधानमंत्री विचारतात. ताचे उपरांतूच हांव ट्विट करतां. प्रधानमंत्र्याचें हेर समाजांचेर कितलें बारीक लक्ष आसता हें समजता, अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
