भांगरभूंय | प्रतिनिधी
उण्यांत उणी गुन्यांवकारी फाटभूंय आशिल्ल्या उमेदवारांक मत दियात, असो उलो एडीआर म्हणल्यार असोसिएशन ऑफ डॅमोक्रॅटीक रिफोर्म्स हे संघटनेन मारला. हाचो अर्थ सगले उमेदवार गुन्यांवकार आसात, असो घेवचो पडलो. मागीर तांचे वयलें गुन्यांवकारी प्रकरण सादें आसूं वा गंभीर. फाटले कांय म्हयने इडी, सीबीआय आमदार, खासदारांचेर धाडी घालीत आसा. थोड्यांच्या आड पुरावेय मेळ्ळ्यात. थोडे सत्ताधारी पक्षांनी उडक्यो घेवपाक लागल्यात. हाचे फाटल्यांनूय ही गुन्यांवकारी फाटभूंय ना मूं? हमाम मे सब नंगे, म्हणटात ते भशेन आयज धुंविल्ल्या तांदळा सारको नितळ, निवळ लोकप्रतिनिधी सांपडप सोंपें न्हय. लोकां खातीर, राज्या खातीर आंदोलन करप्यांचेर एफआयआर नोंद जाता. म्हणटकच तो गुन्यांवकार थारलो. तशेंच चडश्यांचेर भ्रश्टाचार, गैरप्रकाराचे आरोप आसात. ते सगलेच खरे, अशें फक्त न्यायालयाचो निमणो निकाल आयले उपरांतूच म्हणपाक मेळटलें. पूण, बरेच जाण सध्या बंदखणींत आसात, ही गजाल न्हयकारुंक मेळची ना. राजकारणांत देंवप म्हणल्यार हात म्हेळे करून घेवप, अशें अण्णा हजारे हांणी एका तेंपार अरविंद केजरीवाल हांकां म्हणिल्लें. भितर देंवले बगर ती घाण नितळ करपाक मेळची ना, अशी प्रतिक्रिया ताचेर केजरीवाल हांणी दिल्ली. तरीय एका तेंपार नाथ पै, मधु दंडवते सारके जायते प्रामाणीक फुडारी आशिल्ले. आयज हें सांगल्यार लोकांक फट दिसतलें. सरकारी सुविधांचो त्याग करून जीण जगपी फुडारी आयज पसून आसात.
एडीआराच्या मतान, गोंयांत सध्या लोकसभा वेंचणुकेक उबे राविल्ल्या 16 उमेदवारां मदल्या चवगांचेर गुन्यांव नोंद आसात. तातूंतल्या एकल्याचेर गंभीर गुन्यांव आसात. वट्ट 25 टक्के सादे गुन्यांव जाल्यार स टक्के गंभीर गुन्यांव आशिल्ले उमेदवार हे खेपे आसात. कांय मतदारसंघ रेड अलर्ट म्हूण घोशीत केल्यात. थंयच्या उमेदवारांचेर गंभीर गुन्यांव आसा. ह्या मतदारसंघांनी सुरक्षा वाडोवची अशें तांणी म्हणलां. गुन्यांवकारी फाटभूंय आशिल्ल्या उमेदवारांनी वेंचणुकेक उबें रावचें न्हय, अशें मत एडीआरान उक्तायलां. राजकी पक्षांनी तांकां तिकेट दिवपाक जायना, अशेंय तांकां दिसता. मात, आयच्या राजकारणांत उपद्रव मोल आशिल्लो उमेदवार ना, जाल्यार मतदारांकूच अस्वस्थ जाल्ले वरी दिसता. बलात्काराचे आरोप बी जाल्ले उमेदवार हांगा हारल्यात आनी जिखूनय आयल्यात. एकदां न्हय, तर फाटोफाट 3- 4 फावटीं. काळींग घेवन ह्या पक्षांतल्यान त्या पक्षांत आनी मागीर परत आदल्या पक्षांत वचपीय उमेदवार आसात. मजा म्हणल्यार ते दोनूय पक्षांनी वेंचून आयल्यात. हाचो अर्थ मतदारांक तत्वां बी कांय लागनात. आपलें काम जालें काय जालें वा म्हज्या पक्षान सोरोप पसून दवरल्यार हांव ताकाच मत दितलो, अश्या तत्वांचें मतदार आसात. मतदारांनी 15 ते 20 वर्सांचो काळ थारावन दर खेपो उणी गुन्यांवकारी फाटभूंय आशिल्ल्यांक वेंचपाक जाय. म्हणटकच फुडाराक नितळ उमेदवार मेळपाची शक्यताय आसा, अशेंय एडीआराक दिसता. फातरा परस वीट मोव, हो न्याय हांगा लायलो म्हूण राजकारण सुदारतलें, अशी आशा बाळगप हो भाबडो आशावाद थारतलो. कारण, दरवर्सा एक से बढकर एक सर्वगुणसंपन्न, विद्वान उमेदवार वेंचणूक रिंगणांत येत आसात. प्रामाणीक उमेदवाराक विचारता कोण? हो न्हयकारत्मक विचार न्हय, तर वस्तुस्थिती.
जांचे कडेन भरपूर पयशे आसात आनी दादागिरी करपाक मनीस (मसल पावर) आसात, तांकां जिखपाची संद चड आसता, अशेंय एडीआराचें मत. गुन्यांवकारी वृत्तीचो पयशेकार आसल्यार ताका आनीक इल्ली चड संद. म्हणून कांय उमेदवार वोट बँको सांबाळून आसात. तांकां खोशी केले काय ते मतां दितात. मागीर बाकीचे गेले उडत! पुलीस, न्यायालयांनीय तपास, न्यायप्रक्रियेक गती दिवपाक जाय. आमच्या देशांत केशी वर्साचीं वर्सां चलतात. थोड्यांक हे वटेन ते वटेन उडी मारली काय क्लीन चीटूय मेळटा. खरें म्हणल्यार दोन वर्सां बंदखणींत उरत जाल्यार त्या उमेदवाराक वेंचणुकेक उबो रावपाक मेळना. गोंयांत थोडे उमेदवार अशेय आसात, जांचेर गुन्यांव नोंद जाल्यात, पूण तांकां दोशी थारावंक नात.
सध्याच्या 763 खासदारां मदल्या 306 म्हणल्यार 40 टक्के खासदारांचेर गुन्यांव नोंद आसात. तातूंतल्या 194 जांणाचेर खून, बलात्कार, अपहरणा सारके गुन्यांव. बिहार, महाराष्ट्र, तेलंगण, दिल्ली, केरळ हातूंत मुखार आसात. हे गुन्यांव तांणीच प्रतिज्ञापत्रांत दिल्यात. गुन्यांवांनी घुस्पल्ले खासदार सगल्याच पक्षांनी आसात. तेन्ना मतदारांनी विचार करून मतदान करपाक जाय. कारण जें कितें जाता, ताका प्रत्यक्ष तेच जापसालदार आसतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
