भांगरभूंय | प्रतिनिधी
लाखांनी रुपयांची घाली तोपी; वाठारांत खवदळ
फोंडें: फोंडें वाठारांत सद्या खूबशा दुकानदारांक ऑनलायन संकल्पनेंतल्यान स्कॅनराच्या (क्यूआर कोड) माध्यमांतल्यान लुबाडपाच्या प्रकाराक ओतो आयला. दुकाना मुखार लायिल्ले स्कॅनर बदलून फोंडें वाठारांतल्या खूबशा दुकानदारांक लाखांनी रुपयांची तोपी घालपाचे प्रकार वाडिल्ल्यान वाठारांत खवदळ पडला. ह्या प्रकरणातं फोंडें पुलीस स्टेशनार दोन दुकानदारांनी कागाळी दाखल केल्यात. स्कॅनराच्या माध्यमांतल्यान लुबाडपाचे प्रकार वाडत आशिल्ल्यान दुकानदारांनी सतर्क रावपाचे आवाहन पुलिसांनी केलां.
ऑनलायनच्या काळांत विवीध माध्यमांतल्यान लुबाडपाचे प्रकार वाडत आसात. कांय दिसां पयलीं तिस्क फोंड्यां एका दुकानदारान लायिल्लो स्कॅनर बदलिल्ल्याचें उक्तडार आयिल्लें. दुकानांत खरेदी करपा खातीर येवपी गिरायक ऑनलायन माध्यमांतल्यान स्कॅनराच्या आदारान रक्कम जमा करीत आशिल्ले. सुमार दोन-तीन म्हयन्या उपरांत बँकेंत वचून खात्याची तपासणी केली तेन्ना गिरायकांनी जमा केल्ली रक्कम दुकानदाराक दिसून आयली ना. ताका लागून त्या दुकानदारान बँकेंत स्कॅनर दाखोवन चवकशी केले उपरांत अनवळख्यांनी स्कॅनर बदलिल्ल्याचें उक्तडार आयलें. त्या दुकानदाराक लाखांनी रुपयांचो फटको बशिल्ल्याची सद्या चर्चा सुरू आसा.
फाटल्या शेनवारा वारखंड्या एका दुकानदाराक आपल्या स्कॅनराची रक्कम जमा जावंक नाशिल्ल्याचें सांजवेळा समजलें. त्या दुकानदारान रोखडोच दुकानांत दवरिल्ल्या स्कॅनराची तपासणी केली तेन्ना अनवळख्यांनी स्कॅनर बदलून दवरिल्ल्याचें उक्तडार आयलें.
स्कॅनराच्या माध्यमांतल्यान लुबाडणूक जाल्ल्या प्रकरणांत फोंडें पुलीस स्टेशनार दोन कागाळी दाखल जाल्यात. पुलिसांनी ह्या प्रकरणाची चवकशी केली तेन्ना स्कॅनर माध्यमांतल्यान लुबाडिल्ली रक्कम रोखडीच वेगळ्यावेगळ्या खात्यांत जमा करतात. खातेंधारकांचें बँक खातें हेर राज्यांनी आशिल्ल्यान पुलिसांक तपास करपाक आडखळ निर्माण जाल्या. ताका लागून दुकानदारांनी स्कॅनराच्या माध्यमांतल्यान गिरायकां कडल्यान रक्कम स्विकारतना सादुरताय बाळगुपाचें आवाहन पुलिसांनी केलां.
स्कॅनराच्या माध्यमांतल्यान रक्कम स्विकारतना दुकानदारान ल्हान स्पिकर दवरप गरजेचें आसा. रक्कम जमा जाले उपरांत स्पिकारांतल्यान आवाज येता. फोंडें वाठारांत फाटल्या कांय दिसांनी लुबाडिल्ल्या दुकानदारा कडेन स्पिकर नाशिल्ल्याचें दिसून आयलें. ताका लागून अनवळखी स्कॅनर बदलचे पयलीं दुकानाची पळोवणी करीत आशिल्ल्याचो दुबाव आसा.
फोंडें वाठारांतल्या खूबशा जाणांक स्कॅनराच्या माध्यमांतल्यान लुबाडपाचे प्रकार वाडल्यात. ताका लागून खूबशा दुकानदारांनी सतर्क रावन ऑनलायन सेवा बंद करपाचो निर्णय घेतिल्ल्याचें दिसून येता. फोंडें सयत हेर शारांनी लेगीत दुकानदारांची स्कॅनराच्या माध्यमांतल्यान लुबाडणूक जाल्ल्याचो दुबाव पुलीस उक्तायतात. ताका लागून दुकानदारांनी सतर्क रावपाचें आवाहन पुलीस अधिकाऱ्यांनी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
