भांगरभूंय | प्रतिनिधी
16 जाणांक अटक; 15.12 लाखांचो मुद्देमाल जप्त
म्हापशें: डिफेन्स कॉलनी, पर्वरे एका व्हिलाचेर पुलिसांच्या गुन्यांव फांट्यान धाड घालून आयपीएल क्रिकेट बेटींग उक्तडार हाडली. बेकायदो ऑनलायन जुगाराच्या गुजरात आनी उत्तर प्रदेशांतल्या 16 जाणांक अटक केल्या आनी दुबावितां कडल्यान 46 मोबायल, 9 लॅपटॉप हाचे सयत 15.12 लाखांचो मुद्देमाल जप्त केला.
अटक केल्ल्या दुबावितां मदीं विपुलकुमार ठक्कर (45), निशांत ठक्कर (26), हर्षिदकुमार ठक्कर (28), सचीन ठक्कर (29), ऋत्वीक ठक्कर (24), विशाल ठक्कर (20), भावेश ठक्कर (42), चिराग ठक्कर (22), क्रिश मेहेसुरीया (21), संजयकुमार नयी (20), हर्ष घांची (20), रोहनकुमार ठक्कर (24), अल्केशकुमार वाघेला (22), मिहीर ठक्कर (20), विश्वासकुमार ठक्कर (20) हे सगले रावपी पाटणा उत्तर गुजरात आनी अमीत कुमार (25, रा. थाथी, उत्तर प्रदेश) हांचो आस्पाव आसा.
ही कारवाय पुलिसांनी आयतारा 28 वेर रातीं इंडियन प्रिमियर लीग (आयपीएल) टीट्वेन्टी क्रिकेट सर्तींतली सनरायज हैद्राबाद आनी चेन्नय सुपर किंग्स हे मॅची वेळार केली.
डिफेन्स कॉलनी पर्वरे एका व्हिलांत आयपीएलाची बेटींग सुरू आशिल्ल्याची म्हायती गुन्यांव फांट्याक मेळिल्ली. तेप्रमाण पुलीस अधिक्षक राहूल गुप्ता हांच्या मार्गदर्शना खाला निरिक्षक लक्षी आमोणकार हांच्या फुडारपणा खाला हवालदार नित्यानंद हळर्णेकार, इश्वर कासकार, कॉन्सटेबल नवीन पालयेंकार, कल्पेश शिरोडकार आनी कमलेश धारगळकार ह्या पंगडान ही धाड घालून कारवाय केली.
पुलिसांनी गोंय भौशीक जुगार प्रतिबंधक कायदो कलम 3 आनी 4 खाला गुन्यांव नोंद करून सगल्या दुबावितांक अटक केली. तशेंच तांचे कडल्यान 9 लॅपटॉप, एक टॅबलेट, 46 मोबायल फोन, 12 हजार 670 रोख रक्कम आनी हेर साहित्य मेळून 15 लाख 15 हजार 670 रुपयांचो मुद्देमाल जप्त केलो. फुडलो तपास पुलीस करतात.
मजगतीं, फाटल्या 22 मार्चा सावन भारतीय क्रिकेट नियंत्रण मंडळा वतीन इंडियन प्रिमियर लिगेचें आयोजन केलां. तेन्ना सावन दुबावीत आरोपींनी वयलो व्हिला भाड्यान घेवन तातूंत हो ऑनलायन क्रिकेट सट्ट्याचो अड्डो सुरू केल्लो आनी ते वरवीं हो बेटिंगेचो जुगार चलयताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
