दाबोळी विमानतळ बॉम्ब घालून उडोवपाची ई-मेला वरवीं धमकी
भांगरभूंय | प्रतिनिधी
पणजी, बातमीदार ः गोंयांतलो दाबोळी विमानतळ बॉम्ब घालून उडोवपाची धमकी ई-मेला वरवीं आयिल्ल्यान बोवाळ जाला. विमानतळ अधिकाऱ्यांनी आनी सुरक्षा एजन्सीनी ह्या ई-मेलाची गंभीरतायेन दखल घेतल्या. विमानतळार बॉम्ब पंगड हाजीर जाला आनी सुरक्षा कडक केल्या.
गोंयांत दाबोळी विमानतळ उडोवपाची धमकी ई- मेला वरवीं आयले उपरांत अधिकाऱ्यांनी गंभीरतायेन दखल घेतल्या अशी म्हायती विमानतळाचे वरिश्ठ अधिकारी धनंजय राव हांणी प्रसार माध्यमांक दिल्या. आमी आतां अतिरिक्त जतनाय घेतात. तशेंच विमानतळार सुरक्षाय वाडयल्या. हाचो विमान येरादारीचेर कसलोच परिणाम जावचो ना हाची खात्री आसा. गोंय पुलिसांक विमानतळ प्राधिकरणाची औपचारीक कागाळ मेळ्ळ्या. ते प्रमाण बॉम्ब पंगडय थळार हाजीर आसा अशें राव हांणी सांगलें.
आमी थारायिल्ल्या प्रोटोकॉल प्रमाण काम करतात. प्रवाशांक कसलीच असुविधा वा त्रास जावचो न्हय हे खातीर आमी योग्य जतनाय घेतात. मजगतीं, सध्या ईमेल कोणे केलां, खंयच्यान आयला हें सोदून काडपाचे यत्न चालू आसात अशेंय राव हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
