भांगरभूंय | प्रतिनिधी
आदलो उपमुख्यमंत्री बाबू आजगांवकारांची विरीयातो फर्नांडीसाचेर टिका
भांगरभूंय | प्रतिनिधी
काँग्रेसीचे दक्षीण गोंयचे उमेदवार विरीयातो फर्नांडीस हांणी देशाची घटना गोंयकारांच्या माथ्यार मारली अशे सांगून बाबासाहेब आंबेडकर हांचो अपमान केला. देशाचे घटनेक लागून एसटी, एससी, ओबसी लोक दुखावल्यात हे फुडे घटने बाबत कसलोच आरोप सोंसून घेवचे नात, अशी शिटकांवणी आदले उपमुख्यमंत्री मनोहर उर्फ बाबू आजगांवकार हांनी दिली.
घटनेचो सोपुत घेतिल्ले काँग्रेसीचे 10 आमदार फुटून भाजपांत आयिल्ले तेन्ना तांणी घटनेचो अपमान करुंक ना असो प्रश्न विचारले उपरांत बाबू आजगांवकार घुस्पले.
कांय राजकारणी स्वतःच्या फायद्या खातीर जाय तशी भाशा वापरपाक लागल्यात. तांकां राज्य घटना आनी संविधान कितें तें खबर ना. बाबासाहेब आंबेडकर हांणी स्वता अन्याय सोंसून आनी देशा खातीर बलिदान दित भारताची घटना रचली. आनी ती घटना माथ्यार मारली अशे सांगून विरीयातो हांणी आंबेडकर हांचो अपमान केला, असो आरोप आजगांवकर हांणी केला.
भारतात एसटी, एससी, ओबीसी हांकां स्थान नासले. देशाचे घटनेन तांका आस्पावन घेतले. बाबू आजगांवकार ह्या घटनेकच लागून पेडणे मतदारसंघाचो आमदार आनी गोंयचो उपमुख्यमंत्री जावपांक पावलो. देशात बहूजनांनी खुप त्रास काडले आनी वयर सरले. राज्य घटनेन तांकां स्वातंत्र्य दिलें. राज्य घटनेचो अपमान हो आंबेडकर हांचो अपमान. विरायातो हांच्या विधानांक लागून बहजन दुखावल्यात, असो ल दावो करून जर कोण फुडें राज्य घटनेचेर उलयता वा तिका हात लावपाचे चितता जाल्यार आमी ओगी रावचे नात, अशी शिटकांवणी आजगांवकार हांणी दिली.
पुण जे काँग्रेसीचे 10 आमदार पक्षांतल्यान फुटून वच्चे ना अशी संविधानाचेर हात दिवन सोपूत घेतिल्लो, तांणी भाजपांत प्रवेश करून घटनेचो अनादर करुंक ना वा तेन्ना आंबेडकर हांचो अपमान जांवकना काय असो प्रश्न आजगांवकर हांकां विचारतकच ते घुस्पले. तुमी विरीयाताचो विषय आनी 10 आमदारांचो विषय एक करतात. दोनय वेगळे विशय. फोडाफोडीच्या विषयाचेर म्हाका विचारनाकात तुमी ते दिगंबर कामत हांकां विचारात, अशी जाप आजगांवकर हांणी पत्रकारांक दिली. हावें चार फावट पक्षांतर केले. फक्त विकासा खातीर पक्षांतर करचे पडटा. हाव जेन्ना पेडणेचो आमदार जाल्लो तेन्ना कसलीच रस्ते वा उदकाची सुविधा पेडणे मतदारसंघांत नासली. हावें पक्षांतर केलें म्हण पेडणेचो विकास जालो, अशें रजांव आजगांवकार हांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
