भांगरभूंय | प्रतिनिधी
खबरां संस्था ः भारतांत येवपी तारवाचेर शेनवारा ‘रेड सीं’त क्षेपणास्त्रान हल्लो जालो. येमेनांतल्या हुथी बंडखोरांनी ताची जापसालदारकी घेतल्या. ह्या तारवाचें नांव एंड्रोमेडा स्टार आसा अशें म्हण्टात. ते तेल घेवन भारतांत येताले.
अमेरिकेच्या लश्करी केंद्रीय कमांडाच्या म्हणण्या प्रमाण शुक्रारा सांजवेळार 5:49 वरांचेर ही घडणूक घडली. ही बोट ब्रिटनाची आशिल्ली आनी ती अँटिग्वा आनी बार्बाडोस हांचो ध्वज फडकयताली. रशियेंतल्या प्रिमोर्स्क सावन प्रवास सुरू करुन गुजरातांतल्या वाडीनाराक पावपाची आशिल्ली.
मीडिया रिपोर्ट्स प्रमाण भारतांत येवपी तारवाचेर दोन फावटीं हल्लो जालो. हे वेळार हुतींनी जायतीं क्षेपणास्त्रां सोडलीं. पूण पयल्या हल्ल्यांत सोडिल्लीं क्षेपणास्त्रां तारवाचेर पडनासतना लागसारच्या दर्यांत पडलीं. दुसऱ्या हल्ल्यांत तारवाचें लुकसाण जालें.
शुक्रारा हुथींनी भारतांत येवपी तारवांकच न्हय तर अमेरिकेच्या एमक्यू-9 रीपर ड्रोनांचेकूय लक्ष्य केलें. येमेनांतल्या सादा प्रांतांत हुतीनी क्षेपणास्त्र हल्लो करुन ड्रोन उडयला.
हुतींच्या हल्ल्याक लागून भारताक लुकसाण
संवसारीक वेपार आनी कंटेनर येरादारी वर्साक 12% ते 30% रेड सींतल्या सुएझ कालव्यांतल्यान वता. हुती बंडखोरांच्या हल्ल्यांक लागून युरोप आनी आशिया हांचे मदल्या मुखेल मार्गाचेर आंतरराश्ट्रीय वेपारांत आडखळ निर्माण जाला.
भारताचो 80% वेपार दर्या मार्गान जाता. त्याच वेळार 90% इंधन दर्यांतल्यान येता. दर्या मार्गांचेर हल्लो जाल्ल्यान भारताच्या वेवसायाचेर थेट परिणाम जाता. अमेरिकेन सुमार धा देशां वांगडा एक युती तयार केल्या जी रेड सींतल्या हुतींक आडावपा खातीर आनी म्हाल येरादारी बोटींक हल्ल्या पसून राखण दिवपाचें काम करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
