भांगरभूंय | प्रतिनिधी
नवी दिल्ली, खबरां संस्था ः सुप्रीम कोर्टान ईव्हीएम- व्हीव्हीपॅट विरोधांत दाखल केल्ल्यो सगल्यो याचिका भायर मारल्यात. न्यायाधीश संजीव खन्ना आनी न्यायाधीश दिपंकर दत्ता हांच्या खंडपिठान आयज शुक्रारा हे संबंदी याचिकेचेर निकाल दिलो. मतदान ईव्हीएमानूच जातलें, अशें न्यायालयान म्हणलां. तशेंच सगल्या व्हीव्हीपॅट यंत्रांची मतदाना उपरांत चाचणी करपाची मागणीय भायरायल्या.
24 एप्रीलाक सगल्या पक्षांचो युक्तिवाद आयकून खंडपिठान आपलो निर्णय राखून दवरिल्लो. मतदारांचो ईव्हीएमांचेर विस्वास तिगोवन दवरपा खातीर व्हीव्हीपीएटी स्लिपांची शंबर टक्के मेजणी करची अशी मागणी याचिकादारांनी केल्ली. मजगतीं, इलेक्ट्रॉनिक व्होटिंग मशीन वरवीं मतदान केल्ल्या मतां कडेन व्होटर- व्हेरिफायेबल पेपर ऑडिट ट्रेल स्लिप जुळोवपाचे याचिकेचेर निर्णय दितना सर्वोच्च न्यायालयान पोरणी पद्धत तशीच दवरल्या.
सुनावणी वेळार सर्वोच्च न्यायालयान सगळ्याच गजालींचेर अविश्वास दाखेवंक फावना, अशें स्पश्ट केल्लें. खंडपिठान ईव्हीएम संबंदीत 5 प्रस्न वेंचणूक आयोगाच्या अधिकाऱ्यां मुखार मांडलें. तातूंत मुखेल प्रस्न आशिल्लो की ईव्हीएमांत स्थापन केल्लो ‘मायक्रोकंट्रोलर’ रिप्रोग्राम करूं येता काय ना. न्यायालयांत हजर आशिल्ले वरिश्ठ उप वेंचणूक आयुक्त नीतीश कुमार व्यास हांणी हाचे पयलीं ईव्हीएमच्या कार्यावळी संबंदी न्यायालयांत सादरीकरण केल्लें. 24 तारखेक दनपरां 2 वरांचेर खंडपिठान प्रस्नांक जाप दिवपाक तांकां आपयिल्लें. तशेंच कांय गजालींचेर गोंदळ जाला आनी स्पश्टीकरणाची गरज आसा अशें सर्वोच्च न्यायालयान स्पश्ट केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
