भांगरभूंय | प्रतिनिधी
लंडन, खबरां संस्था : फुडार कोणूच पळोवंक शकना आनी कितें घडतले हेंय कोण सांगूक शकना. मनशाक ताच्या जिवितांत फुडें कितें जातलें हें तांकाच खबर नासता. पूण जायते फावटीं अशें जाता की आमी कितें तरी उलयतात आनी फुडाराकय तेंच घडटा. ही खूब अजापाची गजाल. असोच एक धक्को दिवपी प्रकार सध्या खूब चर्चेंत आसा. खरें म्हणल्यार एका चलयेन तिच्या शाळेच्या वेळार फुडारा विशीं निबंद बरयल्लो आनी त्या निबंदांत तिणें बरयल्ल्यो फुडारा विशींच्यो जायत्यो गजाली खऱ्यो थारल्यात.
चलयेन हो निबंद 1969 वर्सा बरोवन सोफा सकयल लिपोवन दवरिल्लो, जो 55 वर्सां उपरांत मेळ्ळो. डेली स्टाराच्या खबरे प्रमाण, चलयेन त्या वेळार अदमास केल्लो की फुडाराक झूम कॉल आनी हाय- टेक टीव्ही मनशाच्या जिविताचो एक भाग जातलो आनी आयज ह्यो गजाली खरेंच आमच्या जिविताचो एक भाग जाल्यात. त्या वेळार ती चली फकत 11 वर्सां पिरायेची आशिल्ली आनी ते पिरायेचेर तिणें तंत्रगिन्याना कडेन संबंदीत हे व्हडले अदमास केल्ले, अशें म्हणटात.
च्युइंग गम आनी चॉकलेटीच्या कारखान्या संबंदीय चलयेन एक अदमास केल्लो, पूण त्यो गजाली अजून विकसीत जावंक नात. खबरां प्रमाण हे चलयेन बरयल्लो हो अद्भुत निबंद पीटर बेकरटनान सोदून काडला. तो एका गिरायकाच्या पोरणें सोफाचे काम करतालो तेन्ना ताका हो बरयल्लो निबंद मेळ्ळो. तारीख 23 फेब्रुवारी 1969 दिसा हो निबंद बरयल्लो. चलयेन निबंद अशें तरेन सुरु केल्लो की एक चली आपल्या फुडाराक जावपी घोवाक कामाक वचपाक सांगून ताच्या कडेन व्हिडियो कॉला वरवीं उलयताली.
चलयेन बरयलां, ‘1969 वर्सा टेलिफोन चौकोनी बॉक्स आसून ताचेर रिसीव्हर बसयल्लो आसतालो. तुमी ज्या लोकां कडेन उलयतात ते लोक तुमकां पळोवंक मेळटात, कारण आतां एक स्क्रीन आसा, जंय तुमी लोकांक पळोवंक शकतात. हें मात्शें दूरदर्शन सारकेंच आसा. पीटराची बायल रोजा हिणें हो निबंद कोणे बरयला तें मेळटलें अशी आस्त बाळगून हो निबंद भौशीक करपाचें थारायलें. आयज ती चली 62 वर्सां पिरायेची आसा. तिका तिचो अदमास कितलो अचूक जालो तें पळोवंक मेळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
