भांगरभूंय | प्रतिनिधी
नवी दिल्ली, खबरां संस्था ः ‘स्त्रीधना’चेर घोवाचें नियंत्रण ना अशें एका म्हत्वाच्या निर्णयांत सर्वोच्च न्यायालयान सांगलें. गरजेच्या वेळार ताका ताचो वापर करुं येता, पूण मागीर तें परत करचें पडटा. बायलेचो तिच्या स्त्रीधनाचेर पुराय हक्क आसा. लग्ना पयलीं, लग्नाच्या वेळार वा लग्ना उपरांत आवय- बापूय, सासर, सोयरे आनी इश्टां कडल्यान मेळिल्ल्यो भेटवस्तू म्हळ्यार स्त्रीधन. ती पुरायपणान बायलेची मालमत्ता आसून, ताचे कितें करपाचें हाचो पुराय अधिकार तिका आसा, अशें न्यायालयान सांगलें.
न्यायाधीश संजीव खन्ना आनी न्यायाधीश दीपंकर दत्ता हांच्या खंडपिठा मुखार बुधवारा एका बायलेन दाखल केल्ले याचिकेचेर सुनावणी जाली. स्त्रीधनाच्या संपत्तीचो गैरवापर जाल्यार आयपीसीच्या कलम 406 खाला घोवाचेर वा ताच्या कुटुंबांतल्या वांगड्या आड कारवाय करूं येता अशें खंडपिठान सांगलें. तशेंच अशा प्रकरणांत गुन्यांवकारी प्रकरणां प्रमाण ठोस पुराव्याच्या आदाराचेर निर्णय घेवचो न्हय, तर बायलेचो दावो चड घट आसा अशा शक्यतायेच्या आदाराचेर घेवचो अशें न्यायालयान सांगलां. संविधानाच्या कलम 142 खाला आपल्या अधिकारांचो वापर करून बायलेचे सगले भांगर जप्त केल्ल्यान घोवाक 25 लाख रुपया भरपाय दिवपाचो आदेश खंडपिठान दिलो.
अशें आसा प्रकरण…
2003 वर्सा लग्न जाले उपरांत बायवेक भेट दिल्ले भांगर आनी बापाय कडल्यान 2 लाख रुपयाचो मेळिल्लो चेक पयले रातीं तिच्या घोवान घेतलो असो आरोप याचिकादारान केलो. उपरांत आवय वांगडा मेळून ताणें ताचो वापर करुन पयशे खर्च करून रीण फारीक केलें. 2009 वर्सा कुटुंब न्यायालयान तिच्या वटेन निकाल दिलो. घोवाक 8.9 लाख रुपया दिवपाचो आदेशय दिलो. पूण केरळ उच्च न्यायालयान हो आदेश कुशीक दवरून घोवान ‘स्त्रीधन’ घेतला हें सिद्ध करपाक बायलेक अपेस आयलां, अशें थारायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
