तकलेंत काम आनी कामांत तकली

भांगरभूंय | प्रतिनिधी

खरें म्हणल्यार आपल्या कामाची जायरात कमी करप आसता आनी कृती चड करपाची आसता, पूण हांगा नडणी खंयूय पावूं कण्णो बरो आसतकच जालो.

जो मेरेन आमची तकली शाबूत आसा तो मेरेन आमी तकलेन सारके आसा आनी मनशांत आसा अशेंच म्हणचें पडटलें. आमकां जर आमचें जिणेचें धंगण उरलें ना तर समजूचें आमी तकलेन सुटल्यात म्हूण. वा आमची तकली चलना. म्हणून दर एकल्यान जिणेचें वेवस्थापन चोख करपाक जाय. अखेर पश्चताप करपाची पाळी कोणाचेर येवची न्हय. जण एकल्यान हांतरूण पळोवन पांय पसरूंक जाय. सांजेक नशिल्ल्यांक वर्रां चड. रीण काडून मोठेपणां मिरोवपाची नस्ती संवय जडल्या. तकली शांत दवरपाक जाय. नाका जाल्लो भार तकलेक दिवंक फावना. पेलता तितलोच ताण दिवचो. चड ताण तणाव बरो न्हय. मागीर नेर्वां चाळवतात. तकली शा़ंत दवरून कामां करपाक जाय. तकलेंत हजार चिंतना घेवन कसलेंच काम सारकें परिपूर्ण जायना. कांय जाण आपआपणाल्यो तकल्यो चलयतात आनी जिणेचे खोबरे करून सोडटात. दर एका कामांत राम आसपाक जाय. एकाद्या कामांत राम ना अशें म्हणपाची पाळी कोणाचेर येवची न्हय. जण एकल्यान आमी जें काम करता ताका प्रामाणीकपणान न्याय दिवपाचो यत्न करपाक जाय. कामांत पयलीं आवड जाय. मनां आड कसलेंच काम कोणेंच करूंक फावना. ज्या कामाक म्हाका नेमला तें काम हांवें प्रमाणीकपणान करपाक जाय. केन्ना केन्ना कितें जाता आमी सगल्यांकूच गृहीत धरतात. कोणाकूच गृहीत धरूंक फावना. दर एक मनीस हो वेगळे कालेतीचो आसता. दर एक काम हे शितिदान करचें आसता. तेन्नाच त्या कामाक यश मेळटा.
चडश्या जणांक दुसऱ्यांच्या कामांत नाक खुपसुवपाची वायट संवय आसता. खरें म्हणल्यार आपल्या कामाची जायरात कमी करप आसता आनी कृती चड करपाची आसता, पूण हांगा नडणी खंयूय पावूं कण्णो बरो आसतकच जालो. तशेंच घडटा. कांय जाण आपली घरचीं कामां टापटीप वेळार करतात. तींच कामां, कामाचे सुवातेर कर म्हणटकच ताका जोर मारता. ही वृत्ती बरोबर न्हय. हो सुवार्थ जालो.
थोड्यांचें तकलेंत कामूच आसना. तें फक्त फॉल्गां सोदतात.
आनी कोणेंय एका अधिकाऱ्यान तांकां काम सांगलें जाल्यार ते रोखडेच मंत्र्या कडेन धांवतात.
सामकेंच सरकारी जावंक सोदतात. लोकांची एक वायट संवय आसा. आमकां शिक्षण खाजगी विद्यालयांनी जाय. नोकरी मात सरकारी सोदतात. सरकारी म्हणटकच तांच्या मतान चड काम करपाची गरज ना. एकदां सरकारांत रुजू जालो की बसून पगार खा. कांय सरकारी नोकर मरून काम करतात. कारण तें आपल्या कामां कडेन पळयतना जनतेची सेवा म्हूण पळयतात. तितलें प्रमाणीकपण कांय सरकारी नोकरवर्गांत दिश्टी पडटा, ना अशें ना. पूण चडावत हो सरकारी जावंयूच जावंक सोदतात. कांय जाण फावराचे लोक आसतात. कांय जाण पयशांचे लोक आसतात. ते कोणाक भियेनात.
आमी जेन्ना एखादें काम प्रिप्लॅन करतात आनी ताची खरपणान अंमलबजावणी करतात तेन्नाच तें काम यशस्वी जाता. आमी ज्या ज्या मळाचेर काम करतात थंय त्या त्या कामांत आमी तकली घालपाक जाय. जें काम करपाचें आसा, तें सतत आमचे तकलेंत आसपाक जाय. ताची सतत फाटपुरवण करपाक जाय तेन्नाच तें काम तडीक पावतलें. ताकाच लागून तकलेंत येवजिल्लें काम आसप म्हणजे तें काम परफेक्ट जाता. काय लोक कामार बेजबाबदारपणान वागतात. तांकां लोकांचे अजिबात पडिल्लें आसना. तांचो फक्त पगारा कडेन संबंध. डीए. एच.आर.ए इंन्क्रिमेंट. बोनस. हांच्योच गजाली चलतात. कांय जाण वाजेवन काम करतात. तांकां ते जें काम करतात तांतूत अजिबात रस आसना. तांकां दुसऱ्यांचीं कामां आवडूंक लागतात.
जांकां जें काम करपा खातीर नेमला तें तो करीच ना, पूण दुसरें एखादे काम कर म्हूण सांगत जाल्यार आवडीन आनी उमेदीन करतात. काम करपाक मुळांत आवड आनी उमेद आसपाक जाय. आपूण करता त्या कामांत आस्था आसची पडटा. काम निश्ठेन करपाक जाय. अन्न जर आवडीन आनी उमेदीन करीत जाल्यार त्या त्या पदार्थाक रुची येता. जेवपी तृप्त जाता. आनी वाजेवन जिवार येवन रांदीत जाल्यार त्या त्या पदार्थाक अर्थ आसना. तें करपता, पोंदाक लागता. मीठ चड उणे पडटा. म्हणून कामांत वेवस्थीत तकली घलपाक जाय. भोगावळ करूंक फावना. आयजकाल कितें जालां ज्या कामांत तकली घालपाक जाय थंय कोण तकली घालीच ना. नाका थंय तकली घालपी हालिंसारा वाडपाक लगल्यात.
धरुया एक शिक्षकाची कोणूय नोकरी करता आसत जाल्यार ताचे तकलेंत शाळा आनी शाळेंत तकली आसपाक जाय अशें विवेकानंद विद्या मंदीर केरी सत्तरीचे मुख्याध्यापक गोपिनाथ गांवस म्हणटा. कारण शिक्षक हो 24×7 उपलब्द आसपाक जाय. शिक्षक एक समाज घडयता. शिक्षकूच जर गैर वागलो जाल्यार एक एक पिळगी बरबाद जावपाक वेळ लागना. दर एका शिक्षकान आपूण जंय शिकयता त्या शाळे खातीर ताणें वेळ काडपाक जाय, आनी वेळ दिवपाक जाय. कितले शिक्षक दितात काय? शिक्षकाक एखादे काम सारकें कर म्हूण सांगचें पडूंक जायना. शिक्षक चुकूंक फावना तितलें भान शिक्षकान पाळूंक जाय. दर एका मळाचेर काम करतना तें बऱ्यांतलें बरें कशें जातलें. दर्जात्मक निकाल कसो येतलो हाचेर सगल्यांनी लक्ष दिवपाक जाय. शिक्षकान दिसान दीस अपडेट जावपाची नितांत गरज आसा. जसो लांकडा मारपी मनीस आपणाल्या आवताक धार काडटा तेच परी शिक्षकान लेगीत आपल्या मेंदवाक विचारांची धार काडपाक जाय. जर शिक्षक वेळारूच अपडेट जालो ना जाल्यार तो खंयच तिगचो ना.आपले आपूण शेणटलो. म्हणून दर एकल्यान दर एक कामांत तकली घलपाक जाय. जण एकल्यान आपणाच्या वाट्यांक आयिल्लें काम आनंदान स्विकारपाक जाय. थंय कुरकूर करूंक फावना. बारीक मोठे केल्लें काम केन्नाच फुकट वचना. प्रत्येक कामांत नवो अणभव मेळटा. कामांतल्यान मनीस अणभव संपन्न जाता. कामांतल्यान मनशाची कालेंतूय कळटा. कितलो बरो कितलो वायट तें कळटा.

काशिनाथ नायक
9158345844