भांगरभूंय | प्रतिनिधी
नवी दिल्ली, खबरां संस्था ः राजकी मळार आरोप करप सोंपें. पूण न्यायालयात घट्ट पुरावे नासतना केल्लो युक्तीवाद तिगून उरना. दिल्ली उच्च न्यायालयांत दाखल केल्ल्या बदनामीच्या प्रकरणांत न्यायालयाची ही टिप्पणी सगळ्या राजकी पक्षां खातीर एक जागृताय आसा.
प्रकरण कितें?
ओडिशा बीजू जनता दलाचे खासदार पिनाकी मिश्रा हांणी दिल्ली उच्च न्यायालयांत बदनामीचो खटलो दाखल केला. ते पुरी लोकसभा मतदारसंघाचें प्रतिनिधित्व करता. ह्या प्रकरणांत न्यायालयान वकील जय अनंत देहाद्रोई हांकां समन्स धाडला. मजगतीं न्यायालयान एक विशेश टिप्पणी केल्या. ‘देशांतल्या उंचेल्या पदाचेर आशिल्ल्या मनशा आड कट करप म्हणल्यार देशद्रोह’ अशें मत न्यायाधीश जसमीत सिंह हांणी मांडले. हे याचिकेंत वकील देहाद्राई हांणी भ्रश्टाचाराचे फटीचे आरोप केल्यात. तांचेर ‘उडियाबाबू, पुरीचो दलाल’ सारके अपमानकारक टिप्पणी केल्ल्याचो आरोप मिश्रान केला.
वकील देहाद्राई दोन पावलां फाटीं
हे प्रकरण उच्च न्यायालयांत आयले उपरांत आतां वकील जय अनंत देहाद्रोई हांणी दोन पावलां फाटीं घेतल्यांत. ह्या प्रकरणांत सीबीआय देहाद्रोईची चवकशी करता अशें न्यायालयान स्पश्ट केलां. प्रधानमंत्र्या आड कट रचपाक मिश्रा हांचो वांटो आशिल्लो असो आरोप करचे नात अशें देहद्रोई हांणी आश्वासन दिल्ल्याचें न्यायालयान नमूद केलां. तशेंच व्हडल्या प्लॅटफॉर्माचेर, बसकेंतल्यान मिश्राचेर कसलोच मनमानी आरोप करचो ना अशें आश्वासन देहाद्रोई हांणी न्यायालयांत दिलें. ह्या प्रकरणांत आपल्या आड कसलोच आदेश दिवचो न्हय अशी विनंती तांणी न्यायालयाक केल्या.
अॅडव्होकेट देहाद्राई हांणी न्यायालयांत युक्तीवाद करतना पिनाकी मिश्रा आड खर पुरावे आसात अशें सांगलें. हो पुरावो आपूण सीबीआय मुखार सादर केला असो दावो तांणी केला. मिश्रान प्रधानमंत्री मोदीं आड कट रचला. हे संबंदीं 140 पानांचो पुरावो आसा. हे पुरावो एकठांय करपा खातीर हांवें म्हजो जीव धोक्यांत घाला. न्यायालयांत हांव उक्तेपणान कांयच सांगचो ना, पूण म्हजे वकील न्यायाधीशा मुखार पुरावे सादर करतले, तातूंतल्यान स्पश्ट जातलें की हो फकत आरोप न्हय असो युक्तीवाद देहाद्राई हांणी केलो. तृणमूल काँग्रेसीची फुडारी आनी खासदार महुआ मोइत्रा आनी दर्शन हिरानंदानी हांचे मदीं लागींची इश्टागत आशिल्ल्याचे देहाद्राई हांचे वकील राघव अवस्थी हांणी न्यायालयांत सांगलें. ह्या प्रकरणाची फुडली सुनावणी 29 जुलयाक जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
