भांगरभूंय | प्रतिनिधी
वापरप्यांनी चवथे तिमाहींत 40.9 एक्साबाइट डेटा वापरलो
नवी दिल्ली, खबरां संस्था ः डेटा वापरपाचे नदरेन दूरसंचार कंपनी रिलायन्स जियो ही सगळ्यांत व्हडली मोबायल ऑपरेटर जाल्या. चीन मोबायलाक फाटीं घालून जियोन ही सुवात मेळयला.
जागतीक विश्लेशक कंपनी इफिशिएंटाच्या अहवाला प्रमाण जानेवारी- मार्च तिमाहींत जियो नेटवर्काचेर वट्ट डेटा वापर 40.9 एक्साबायट मेरेन पावलो, जाल्यार चायना मोबायलाचो डेटा 38 एक्साबायट इतलो आसा.
संवसारीक पांवड्यार 108 कोटी गिरायकां सयत जियो ही सगळ्यांत चड 5 जी गिरायक आशिल्ली दुसरी दूरसंचार कंपनी आसा. आतां जिओच्या वट्ट वायरलेस डेटात 28% परस चड 5 जी वापरप्यांचो वांटो आसा.
सरासरी एक जिओ वापरपी म्हयन्याक 28.7 जीबी डेटा वापरता
अर्थीक वर्स 2024 च्या निमाणे मेरेन जियोची वट्ट गिरायकांचो आंकडो 449 दशलक्षांतल्यान 482 दशलक्ष मेरेन वाडोवपाची येवजण आंखल्या. तेच बरोबर सरासरी एक जियो वापरपी म्हयन्याक 28.7 जीबी डेटा वापरता.
वापरप्यांक बेगीन जोडल्यार जियोची येणावळ वाडटली
जियो वापरप्यांची नेटान वाड आनी बाजारांतलो वाडिल्लो वाटो फुडल्या काळांत, जेन्ना टॅरिफ दर (रिचार्ज प्लॅन) वाडयतले तेन्ना कंपनीची येणावळ वाडटली अशें इकोनॉमिक टायम्सच्या तज्ञांनी उल्लेख केला. लोकसभा वेंचणुके उपरांत रोखडेंच 20%-25 टक्क्यांनी दर वाडूंक शकतात अशें तज्ञांचें मत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
