यशस्वी काय प्रभावीक ?

भांगरभूंय | प्रतिनिधी

यश जोडटना दुसऱ्यांक भुलोवप, फटोवप आनी लांच दिवप आनी आपली जबाबदारी पुराय जाली म्हूण मिरोवप, हें तर आमचे मदीं वाडूंक लागलां. यश मेळयतना आमी विस्वाशीपण सांभाळप गरजेचें.

आयज आमचे मदलीं जायतीं जणां आपणाक जाय तशें, आपणाक दिसता ते भशेन, कशें जियेवंचें ती आपली मेकळीक म्हण मानून घेवन जियेतात. हातूंत, तांकां कांयच उणेपण भोगना. परतेंच जाल्यार जिणेंत कितें तरी जडिल्ल्या खातीर अभिमान भोगता. असल्या वातावरणांत जियेतल्यांची वृत्ती विचित्र कशी. जिणेंत यश मेळ्ळ्यार पुरो. कसली तरा वापरल्या, कसलो वावर केला, कशेपरीं वावर केला, हाचेर चडशी आडनदर जाता. पूण यश तांची मोख. गाडी चलयतना येरादारीचे नेम पाळिनासताना वेगीं पावललो आपणें यश जोडलें म्हूण हड्डे फुलोवन सांगतात. तसली गत ती. यश जोडटाना फक्त यशाचेर भर दिवप काय विस्वाशीपण सांभाळून प्रभावीक तरेन यश जोडप हें समजून घेवंक आमी दोन घडितां पळेवंया.
घडीत 1 : ‘ते’ कॉलेजींत शिकोवपी तो व्याखातो बरो निकाल हाडूंक सदांच वावुरतालो. तो खुपूच शिस्तीचो जाल्ल्यान शिकपी ताका भियेतालीं. जिणेंतूच शिस्त न्हय, पूण शिक्षणीक मळार पासून शिस्त हाडूंक आग्रो धरतालो. हे वरवीं ताणें जायतीं वर्सां शिकप्यांक भिरांत घालून बरो निकाल हाडून ते कॉलेजींत नांव जोडिल्लें. प्राचार्य पासून खुपूच खुशाल जाल्लो. त्या शिकोवप्याच्या मता प्रमाणें, ताणें यश जडिल्लें. हें तो अभिमानान सांगतालो. तो गेल्या उपरांत ते कॉलेजींत निकाल देंवत गेलो.
घडीत 2 : अशोक ‘ते’ कंपनींत पांच वर्सां वावुरललो. जाता तितली येणावळ त्या वर्सांनी आयलली. ‘ते’ कंपनींत बरी शिस्त ताणें हाडलली. सगळे कामार वेळार येताले. आपलीच कंपनी जाल्ले वरीं वावुरताले. कांय कारणांक लागून अशोकान ते कंपनींतलो वावर सोडून दिलो. ताणें वोंपलली शिस्त मात पालेवन फुलून आयज फळां दिता. आयज ती कंपनी समाजांत आनी उद्देगीक क्षेत्रांत परजळटा.
जायते फावटी यश जोडटना आमी फक्त दिल्ली जबाबदारी वा आंखलली येवजण पुराय जावंक जाय हाचेर भर दितात. असलें यश कितलीं मेरेन फळां दिता तें मात सांगूंक कठीण. पयल्या घडितांत त्या शिकोवप्याची नदर फक्त निकालाचेर आसली. शिकप्यांक भें घालून तो बरो निकाल हाडटालो. ताणीं घातिल्लें भें मात थोडोच काळ तगलें. यश जोडटना आमकां दिल्ली जबाबदारी बाळगून फक्त यशाचेर भर दिल्यार:
 इश्टांचे पंगड वाडटात: आयज आमी धांवपाचे स्पर्धेंत आसात. कशेंय तरेन यश मेळूंक जाय हेंच मनांत आसा. असल्या जैतांत सांगात दिवपीय खूप आसात. हे सांगाती फक्त यश मेळटा म्हणसर यश जोडटल्या बरोबर रावतात.
 तत्वां- मुल्यांचेर आड: फक्त यश ही मोख फुड्यांत दवरून वावुरले जाल्यार थंय मुल्यां- तत्वांक सुवात मेळना. यशा फुड्यांत तत्वां- मुल्यांची भास फायद्याक पडना.
 नांवाखातीर जैत: तत्वां- मुल्यांची भास कुशीक काडून जोडिल्लें जैत फक्त नांवलौकीक जावंक आदार जाता. आमी कितें तरी जोडिल्ल्याची खोस आमकां जाता, पूण हें जैत फक्त खिणा पुरतें.
 जिणेंत निर्शेणी: जिणेंत देंवती आनी चडटी आसा हें फक्त यशाचेर भर दिल्ल्यांक मानून घेवंक खूप कठीण जाता. एकदां अपयश आमच्या वांट्याक आयलें जाल्यार आमची परिस्थिती वा ते परिस्थिती कडेन पळेवंची वृत्ती, आपो-आप न्हयकारी जावंक वेळ नाका. हे वरवीं जिणेंत सगळें सांडलें म्हण हात- पांय पांगरून बसूंक वा निर्शेणेची जीण मागून घेतात.
यश जोडटना दुसऱ्यांक भुलोवप, फटोवप आनी लांच दिवप आनी आपली जबाबदारी पुराय जाली म्हूण मिरोवप, हें तर आमचे मदीं वाडूंक लागलां. यश मेळयतना आमी विस्वाशीपण सांभाळप गरजेचें. विस्वाशीपणीं आमी ध्येया कडेन पावलां उबारलीं जाल्यार आमकां प्रभावीक तरेन यश जोडूंक सोंपें जातलें. वयर दिल्ल्या दुसऱ्या घडितांत अशोकान आपले जबाबदारेंत विस्वाशीपण दाखयलें. तांच्या विस्वाशीपणाचें फळ ते कंपनीक लांब काळाक यश जोडूंक बऱ्याक पडलें.
यशस्वी आनी प्रभावीक रितीन यश जोडप ह्यो वेगवेगळ्यो वृत्ती. यशस्वी फक्त जबाबदारी पुराय करपाचेर भर दिता. पूण प्रभावी यश मातशें फुडें वता. आमी जोडिल्लें यश सासणीक प्रभाव घालता जाल्यार तत्वां- मुल्यां आमकां आमचीं कशीं दिसतलीं. तत्वां -मुल्यांची भास आमचो जिणेसांगाती जावंक वेळ लागचोना. नीज मान-आदर मेळोवन घेवन समाज घडोवंक पालव मेळपाचो.

जॉन एम्. आल्फोंसो, कार्मेलीत,
7666519837