भांगरभूंय | प्रतिनिधी
बंगळुरू, खबरां संस्थाः कर्नाटकाच्या गदग गांवात भावानूच आपल्या आवय- बापूय आनी भावाची हत्या करपाक 65 लाख रुपयांची सुपारी दिली. ताच्या भावाक सगळी मालमत्ता मेळ्ळी म्हूण ताका राग आयल्लो. 19 एप्रीलाक हल्लो केलो पूण, आवय- बापूय जिवे उरले, पूण ताचो भाव आनी हेर तीन वांगड्यांक मरण आयलें.
कार्तिक बकाले (27), परशुराम हादिमानी (55), लक्ष्मी हादिमानी (45) आणि आकांक्षा हादिमानी (16) अशीं मरण आयिल्ल्यांची नांवा आसा. हे प्रकरणांत पुलिसांनी कार्तिकाचो भाव आनी मास्टरमाइंड विनायक बकाले सयत हेर 8 जाणांक अटक केल्या.
कार्तिक आनी विनायक बकाले हे भाजपा फुडारी आनी गडग- बेटागिरी पालिकेचे उपाध्यक्ष प्रकाश बकाले आनी सुनंदा बकाले हांचे पूत. पुलिसांनी दिल्ले म्हायती प्रमाण कार्तिकाचे लग्न थारिल्ले ते खातीर मरण आयिल्ले हादिमानी कुटुंब थंय आयिल्ले.
मालमत्तेच्या वादाक लागून हल्लो केल्ल्याचो दुबाव
घडणूके उपरांत पुलीस थंय पावले तेन्ना भांगराचे अलंकार आनी रोख पयशे थंयच आशिल्ले देखून हो खून चोरयेचे हेतून केल्लो ना असो दुबाव पुलिसांक आयलो. पुलिसांच्या म्हणण्या प्रमाण दोनूय भावां मदीं मालमत्तेचेर वाद जाल्लो आसूं येता अशी शक्यताय आसा. प्रकाश बकाले सगली मालमत्ता कार्तिकाक दिवपाचो आशिल्लो, ताका लागून विनायकाक राग आयलो आनी ताच्या आवय- बापायक आनी भावाक मारपाचो कट तांणे रचलो.
पुलीस महानिरीक्षक (उत्तर विभाग) विकास कुमार हांणी सांगलें विनायक प्रकाश बकाले (35), फराजी काझी (29), जिशान काझी (24), साहिल अशफाक काझी (24), सोहेल अशफाकी काझी (19), सुलतान जिलानी शेख (23), महेश जगन्नाथ साळुंखे (21) आनी वाहीद लियाकत बेपारी (21) हांका अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
