भांगरभूंय | प्रतिनिधी
सोशल मिडियाचेर साबार तरांचीं व्यक्तीमत्वां. थोड्यांनी खास विखारी टिका करपा खातीर 2- 3 अकावंट उक्ते केल्यात. थोडे सादे कमेंट करून तुस्त करतात. थोडे फक्त चलयांची तुस्त करतात, तर कांय जाण समाजप्रबोधन करपी, गिन्यान वाडोवपी पोस्ट, कमेंट करतात. अदीं मदीं सोशल मिडिया गाजत आसता. सध्या मराठी अभिनेतो चिन्मय मांडलेकर गाजता. कारण जालां ताच्या पुताचें नांव. तो सध्या 11 वर्सांचो आसा. म्हणल्यार 2013 तलो ताचो जल्म. ताचें नांव जहांगीर. चिन्मय म्हणटा, संवसाराचेर जैत जोडपी, असो ताचो अर्थ. चल्याक नांव दवरप हो म्हजो खाजगी प्रस्न. कोण म्हाका सल्लो दिवपाक शकना. ताणें व्हिडियो घाला. ताचे आदीं ताचे घरकान्नीन नेहा जोशीन पोस्ट घालून नांवा वयल्यान आपली बाजू मांडपाचो यत्न केल्लो. मात, दोनूय व्हिडियो सकयले कमेंट वाचीत जाल्यार चिन्मयाचेर सकयल्या पांवड्या वयल्यान टिका जाल्ली वाचपाक मेळटा. मुस्लिमाचें नांव तुवें दवरलेंच कशें, असो प्रस्न चडश्यांनी विचारला. उरिल्ल्यांनी ताका पाकिस्तानांत वचपाचो सल्लो दिला. तर थोड्यांनी छत्रपती शिवाजी महाराजांची भुमिका करता आनी नांव बिगर हिंदू दवरलां, जनाची नाजाल्यार मनाची तरी लज आसा काय ना, असो प्रस्न विचारला. चल्याच्या नांवा वयल्यान आमचो मानसीक छळ चल्ला. दोन व्हिडियो घालूनय ट्रोलींग आनी कमेंट उणें जावंक नात. लोक दुबाव घेतात. व्यक्ती म्हूण म्हाका तें त्रासदायक आसा, अशें चिन्मयाचे घरकान्नीन म्हणलां. म्हजे खाजगी जिणेचेर टिका सुरू जाल्या. जहांगीर आर्ट गॅलरी आसा. भारतरत्न जे आर डी टाटा हांचें नांव जहांगीर. तीं नांवां बदलतले? टाटा कंपनीच्यो सेवा, सुविधा न्हयकारतले? असो प्रस्न चिन्मयान केला. मात, टिका करपी ताच्या एकाय मुद्याक जाप दिनासतना फक्त मुस्लिमांचें नांव, औरंगजेबाचें नांव दवरलेंच कशें ह्या एकाच मुद्याक दसून रावल्यात. तें नांव बेगोबेग बदलचें, असो सल्लोय ताका दिला.
काल ह्या ट्रोलिंगाक लागून चिन्मयान आपूण छत्रपती शिवाजी महाराज हांची भुमिका करचो ना, अशें जाहीर केलां. श्री शिवराज अष्टक माळेंतले पांच सिनेमा आतां मेरेन तयार जाल्यात. उरिल्ले तीन येवपाचे आसात. तातूंत आपूण आतां छत्रपतींची भुमिका करचो ना, अशें ताणें म्हणलां. मात, करपाक गेलो एक आनी जालें भलतेंच अशें हेय बाबतींत घडलें. हांगाय ताचेर टिका जाली. ताची लायकीच वयर काडली. खरें म्हणल्यार जहांगीर हें मूळ उतर फारसी भाशेंतलें. पारशी, मुस्लिमांनी तें स्विकारलां. ताचो अजून वापरुय जाता. चिन्मयाच्या पुताचें नांव 2013 तलें. फाटलीं इकरां वर्सां कोणे ताचेर हरकत घेवंक ना. मात आतां अचकीत लोकांक तें कळ्ळें आनी म्होंवा मुसांनी हल्लो करचो, तशे ते मांडलेकर जोडप्याचेर तुटून पडले. चिन्मयाक थोड्या अभिनेत्यांनी तेंको दिला. तांचेरूय टिका जाल्या. सामान्य लोकांनीय ताचे वटेन कमेंट घाल्यात. पूण टिका करप्यांचो आंकडो तांचे परस कितलेशेच पटीन चड आसा. आतां, महाराष्ट्राचे मुख्यमंत्री, गृह मंत्री, पुलिसांनी ट्रोलर्सांचेर कारवाय करची, असो उलो मांडलेकर जोडप्यान मारला. पूण तो कोण आयकतले वा नात, तें सांगपाक येना. कारण हो वेंचणुकेचो काळ. ते खातीरूच (मतांच्या ध्रृवीकरणा खातीर) हो मुद्दो ट्रोलर्सांनी लावन धरला, अशें कांय जाणांचें मत. पूण, एका गुणी अभिनेत्याची रातची झेम इबाडपा सारको हो प्रकार हें मानून घेवचेंच पडटलें.
सोशल मिडिया वयल्या ट्रोलाक भियेवन वा रेब्यांत कोण गुंडो मारतलो म्हूण बरेच जाण सहसा कसलेच वादग्रस्त पोस्ट घालिनात वा कमेंटूय घालिनात. थोड्यांनी तर फेसबुका सारकें माध्यम टिका जाता म्हूण सोडलां. थोडे वादग्रस्त पोस्ट मुद्दाम घालतात आनी उपरांत परत जाप दिनात. मात हांगां मांडलेकर जोडप्यान टिका जातना एका फाटोफाट दोन व्हिडियो घाले आनी तें त्रासांत पडलें. ह्या वादाचो त्या भुरग्याचेर कितें मानसीक परिणाम जाला तें मात कळूंक ना.
चिन्मय हो लेखक, दिग्दर्शकूय. काश्मीर फायल्स सिनेमांत ताणें काम केलां. पयलीं सोशल मिडियाचेर चड टिका जायनाशिल्ली. मात 2015- 16 च्या सुमाराक अचकीत ती सुरू जाली. ह्या प्रकाराक लागून समाजांत एक वैचारीक दुस्वास निर्माण जाला. दोनूय वटेनच्यान सकयल्या पांवड्यार टिका करपी अविचारी लोक आसात. हो दुस्वास फुडाराक घातक थारपाची भिरांत न्हयकारपाक येना. तेन्ना प्रत्येकान विचार करून कमेंट
केल्यार बरे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
