भांगरभूंय | प्रतिनिधी
मडगांव: संवसारांत नामना आशिल्ले मनोविश्लेशक तशेंच साहित्यीक सुधीर काकर हांकां बाणावले रावत्या घरा मरण आयलें. तांची पिराय 86 वर्सांची आशिल्ली. तांचे फाटल्यान घरकान्न- कॅथरिना, पूत- राहूल, धूव- श्वेता असो घराबो आसा. तांचे कुडीचेर मंगळारा दिल्लींत निमाणे संस्कार जातले अशी म्हायती लागींच्या सोयऱ्यांनी दिली.
सुधीर काकर हांचो जल्म नैनीताल हांगा 1938 वर्सा जाल्लो. गुजरातांत मॅकानिकाल इंजिनियरींग पुराय केले उपरांत तांणी जर्मनींत मास्टर पदवी घेतिल्ली. हारवर्ड युनिव्हर्सिटींत अधिव्याख्यातो म्हूण तांणी काम केल्लें. उपरांत 1975 वर्सा ते भारतांत आयले आनी दिल्लींत मनोविश्लेशक म्हूण कार्य सुरू केल्लें.
द इनर वर्ल्ड, द इंडियन अशीं विवीध पुस्तकां तांणी बरयल्यांत. तशेंच इंडियन कौन्सील ऑफ सोशल सायन्स रिसर्च हाचे सयत विदेशांतल्या युनिव्हर्सिटी कडल्यानूय तांकां विवीध पुरस्कार दिवन तांचो भोवमान केला. तांणी गोंय युनिव्हर्सिटींत कोसंबी व्हिजिटींग रिसर्च प्रोफेसर म्हूण 2013 वर्सा काम केल्लें. इंडियन सायकोअॅनालिस्ट सोसायटी सयत विवीध मनोविश्लेशक संस्थांनी आनी देशभरांतल्या मानेस्तांनी तांच्या मरणाचेर दुख्ख उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
