भांगरभूंय | प्रतिनिधी
2009 वर्सा उत्तर गोंयच्यान लडयिल्ली वेंचणूक
दक्षिणेंत 1998 उपरांत मगोचो उमेदवरूच ना
पणजी: गोंयचे मातयेंत रुजिल्लो आनी दोळे दिपकावपी इतिहास लाबिल्लो महाराष्ट्रवादी गोमंतक पक्ष 2009 उपरांत लोकसभा वेंचणुके पसून पयसूच आसा. ह्या पक्षान राज्याक एकसुरी बायल मुख्यमंत्री दिवपा बरोबरूच एकसुरी बायल खासदारूय दिल्या. 2009 वर्सा पांडुरंग रावत हांणी उत्तर गोंय लोकसभा मतदारसंघांतल्यान मगो वतीन वेंचणूक लडयिल्ली. सर्गेस्त पांडुरंग रावत हांचे उपरांत कोणेंच मगो वतीन लोकसभा वेंचणूक लडयली ना.
दक्षीण गोंयचो विचार करीत जाल्यार सगल्यांत निमाणी पद्मनाभ आमोणकार हांणी 1998 वर्सा मगो पक्षा वतीन वेंचणूक लडयिल्ली. 1998 च्या लोकसभा वेंचणुके उपरांत दक्षीण गोंयांत मगोन उमेदवार उबो केल्लो ना. तशेंच 1996 वर्सा मगो पक्षा वतीन रमाकांत खलप हे जैतिवंत जावन लोकसभेंत पाविल्ले. सद्या काँग्रेसीचे उमेदवार आशिल्ले रमाकांत खलप हे मगोचे निमाणें खासदार आसात. 1996 उपरांत गोंयांत मगोचो खासदार जाल्लो ना.
नव्यानूच उदयाक आयिल्ल्या आरजी पक्षानूय ह्या वेळार लोकसभा वेंचणुकेच्या रिंगणांत उडी घेतल्या. 2014, 2019 आनी आतां 2024 चे लोकसभा वेंचणुकेंत महाराष्ट्रवादी गोमंतक पक्षान उमेदवार दवरिल्लो ना. 2014 वर्सा मगोन भाजप उमेदवाराक जाल्यार 2019 चे वेंचणुकेंत काँग्रेस उमेदवाराक तेंको दिल्लो. आतां 2019 चे वेंचणुकेंत सरकारांत आशिल्ल्यान मगोचो भाजपा उमेदवाराक तेंको आसा.
सद्या मगोचे उपाध्यक्ष आशिल्ले नारायण सावंत हे मगोचे निश्ठावान कार्यकर्ते आसात. खूबशीं वर्सा ते मगो पक्षांत आसात. 2009 वर्सा जाल्ले लोकसभा वेंचणुके वेळार गोंयांत काँग्रेस आनी राष्ट्रवादी आघाडीचें सरकार आशिल्लें. उत्तरेची सुवात राष्ट्रवादीक सोडिल्ली. राष्ट्रवादी काँग्रेसीक उमेदवार मेळनाशिल्लो. निमाणें काँग्रेसीचे जितेंद्र देशप्रभू हांणी राष्ट्रवादींत प्रवेश केलो आनी राष्ट्रवादी वतीन वेंचणूक लडयली.
हे फाटभुंयेर मगोचे तेन्नाचे अध्यक्ष पांडुरंग रावत हांणी उमेदवारी दाखल केली. सुमार देड हजार मतां तांणी मेळयिल्लीं. उपरांत मतभेद जाल्ल्यान रावत हांणी मगोक रामराम केलो अशी म्हायती नारायण सावंत हांणी दिली.
गोंय मुक्ती उपरांत दरेक वेंचणुकेंत उमेदवार उबो करपाची मगोची परंपरा सगल्यांत पयलीं 1999 चे वेंचणुकेंत खंडीत जाली. उपरांत फक्त 2009 चे लोकसभा वेंचणुकेंत मगोचो उमेदवार आशिल्लो. महाराष्ट्रवादी गोमंतक पक्षाच्या उमेदवारीचेर दक्षीण गोंयांत हिंदू उमेदवार (मुकूंद शिंक्रे, 1962) जैतिवंत जाल्ले. उत्तर गोंयांत पीटर आल्वारीस (1962) हे क्रिस्तांव उमेदवार जैतिवंत जाल्यात. अशी फाटभूंय आशिल्ल्या ह्या पक्षाचे 1998 उपरांत लोकसभेंत केन्नाच अस्तित्व दिसलें ना.
उत्तर गोंयचे मगोचे खासदार
पीटर अल्वारीस- 1962
अमृत कांसार- 1977
संयोगिता राणे- 1980
गोपाळराव मयेंकार- 1989
रमाकांत खलप- 1996
दक्षीण गोंयचे मगोचे खासदार
मुकुंद शिंक्रे- 1962
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
