भांगरभूंय | प्रतिनिधी
तिरुपती, खबरां संस्था: संवसारांतलें सगळ्यांत गिरेस्त देवूळ ट्रस्ट तिरुमला तिरुपती देवस्थानम (TTD) न अंदूं ११६१ कोटी रुपयांची एफडी केल्या. फाटल्या १२ वर्सांतली ही सगळ्यांत चड रक्कम जावन आसा. हो ट्रस्ट संवसारांतलो सगळ्यांत गिरेस्त देवळाचो ट्रस्ट जावन आसा. अहवाला प्रमाण, हो ट्रस्ट देशांतलो एकूच हिंदू धर्मीक ट्रस्ट जो फाटल्या १२ वर्सां सावन शेगीत ५०० कोटी रुपया वा ताचे परस चड रुपया जमा करता.
२०१२ मेरेन ट्रस्टाच्यो मुदत ठेवी ४८२० कोटी आशिल्ल्यो, उपरांत २०१३ ते २०२४त तिरुपती ट्रस्टान ८४६७ कोटी रुपया जमा केल्या. बँकेंत ट्रस्टाची वट्ट एफडी १३,२८७ कोटी रुपयां वयर पावल्या.
तशेंच देवळाच्या ट्रस्टा वरवीं चलोवपी जायते ट्रस्ट आसात जातूंत श्री व्यंकटेश्वर नित्य अन्नप्रसादम ट्रस्ट, श्री व्यंकटेश्वर प्रंदनम ट्रस्ट आनी हेरांचो आसपाव आसा. सुमार ५५२९ कोटी रुपयांची मुदत ठेव आसा.
बँक बॅलन्स १८८१७ कोटी रुपयां वयर पावलो
सगळ्यो बँको आनी ट्रस्टा मदल्या तिरुपती ट्रस्टाचो बँक बॅलन्स १८८१७ कोटी रुपयांचेर पावला. जी आतां मेरेनच्या इतिहासांतली सगळ्यांत चड रक्कम जावन आसा. ट्रस्टाक ताचे एफडीचेर व्याज म्हणून दरवर्सा सुमार १,६०० कोटी रुपया मेळटात. तशेंच हालींच १,०३१ किलो भांगर जमा जाले उपरांत देवळाचो बँकेंतलो भांगराचो सांठोय ११,३२९ किलो जाला.
२०१२ त ट्रस्टाची एफडी ४८२० कोटी रुपया आशिल्ली
तिरुपती ट्रस्टाच्या मुदत ठेवी वर्सा प्रमाण वाडत आसा. २०१३त ६०८ कोटी रुपया, २०१४त ९७० कोटी, २०१५त ९६१ कोटी, २०१६त११५३ कोटी, २०१७त ७७४ कोटी, २०१८त ५०१ कोटी रुपयांच्यो एफडी आशिल्ल्यो. कोरोनाच्या काळांत फाटल्या १२ वर्सांनी पयलेच फावट एफडीची रक्कम उणी जाल्ली. २०१९त २८५ कोटी रुपया, २०२०त ७५३ कोटी रुपया, २०२१त २७० कोटी रुपया आनी २०२२त २७४ कोटी रुपयांच्यो एफडी आशिल्ल्यो. फाटल्या वर्सा ट्रस्टान ७५७ कोटी रुपयांची एफडी केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
