भांगरभूंय | प्रतिनिधी
पणजी, प्रतिनिधी : गोंय शालांत मंडळान घेतिल्ले बारावेचे परिक्षेचो निकाल जाहीर जाल्ल्यान विद्यार्थ्यांची आतां म्हाविद्यालयीन प्रवेशाची तयारी सुरू जाल्या. कला, वाणीज्य आनी विज्ञान शाखेच्या पयल्या वर्साच्या प्रवेशाची प्रक्रिया १० मे सावन सुरू जातली, अशी म्हायती उंचेलें शिक्षण संचालनालयाचे संचालक भुषण सावयकार हांणी दिली.
म्हाविद्यालयीन पावंड्यार नव्या राष्ट्रीय शिक्षण धोरणाची कार्यवाय सुरू जाल्या. तिका लागून अंदूं म्हाविद्यालयीन प्रवेशाची सुरवात उसरां जाल्या. फांटले वर्सा प्रमाण अंदूंय सगळ्या म्हाविद्यालयांनी एकवटान (सेंट्रलायजड) प्रवेश प्रक्रिया सुरू जातली. अर्ज घेतल्या उपरांत गुणवत्ता वळेरी जाहीर जातली. ते प्रमाण प्रवेश दितले, अशें संचालकांनी सांगलें.
पोरूं परस अंदू निकालाचें प्रमाण उणें आसा. हाका लागून म्हाविद्यालयांनी जागे वाडोवपाची गरज पडची ना. वैजकी, अभियांत्रिकी ह्या वेवसायीक म्हाविद्यालयाचो प्रवेश नीट, जेईई ह्या प्रवेश परिक्षेच्या गुणांचेर जातलो. वेवसायीक म्हाविद्यालयाची प्रवेश प्रक्रिया तांत्रीक शिक्षण संचालनालया वतीन जातली, अशी म्हायती तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
