भांगरभूंय | प्रतिनिधी
मडगांव, प्रतिनिधी : हालींच नुतनीकरण केल्ल्या गोवा कला अकादमीचें फॉल्स सिलींग कोसळिल्ल्याची घडणूक घडली. पणजी स्मार्टसिटी आनी कला अकादमीचीं कामां कसलीं तें सैमूच दाखोवन दिता. भ्रश्टाचारा वांगडा सामक्या सकयल्या दर्जाचीं कामां हें विकसीत भारताचें मॉडेल जावन आसा, अशी टिका विरोधी पक्ष फुडारी युरी आलेमांव हांणी केली.
कॉंग्रेसीन जाहीरनामो प्रसिद्ध केले उपरांत भाजपाक घाम सुटला. कला अकादमीची सिलिंग कोसळिल्ल्यान उदरगतीच्या कामांचो आनीक एक भ्रश्टाचार मुखार आयला. ४ जुनाक भाजपाची अहंकारी राजवट कोसळटली, अशी टिका आलेमांव हांणी केली.
वेंचणुकेच्या काळांत भाजपा कितलो भ्रश्टाचार करता हें सैम दाखोवन दिता. दोन दिसां पयलीं १५०० कोटीं परस चड खर्च केल्ले स्मार्ट सिटी पणजींत हुंवाराची स्थिती निर्माण जाली. अटल सेतूचेर पडिल्ल्या फोंडकुलांक लागून भाजपाचे राजवटींत भ्रश्टाचार जाला हें स्पश्ट जाल्लें. गोंयची वळख, पर्यावरण आनी सैमीक सौंदर्य नश्ट करून भाजपान उदरगत केल्या, अशें आलेमाव हांणी सांगलें.
गोंयकार लोकसभा वेंचणुकेंत भाजपाक धडो शिकयतली. लोकांचें लक्ष बेरोजगारी, म्हारगाय, वाडपी गुन्यांव आनी भ्रश्टाचाराचेर आसा. भाजपान हाची जाप दिवची अशी जनतेची मागणी आशिल्ल्याचेंय आलेमाव हांणी म्हणलें.
समिती स्थापन करून चवकशेची मागणी
सुमार ७५ कोटी खर्च करून केल्ल्या कला अकादमीच्या नुतनीकरणाच्या कामाची उच्च न्यायालयाच्या निवृत्त न्यायाधीशां वरवीं उच्च पांवड्यावयले चवकशेची मागणी केल्ली. मात भाजप सरकारा मदीं असल्या चवकश्यांक फुडो करपाची तांक ना. मुख्यमंत्री डॉ. प्रमोद सावंत हांणी आतांच उच्च न्यायालयाच्या निवृत्त न्यायाधीशांच्या अध्यक्षतेखाला चवकशी आयोग स्थापन करून कालबद्ध चवकशेचे आदेश दिवचे, अशी मागणी आलेमांव हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
