भांगरभूंय | प्रतिनिधी
म्हापशें, प्रतिनिधी ः कांदोळे एका व्हिलाचेर उत्तर गोंय जिल्हो पुलीस गुप्तचर पंगडान धाड घालून आयपीएल बेटिंग उक्ताडार हाडलें. ह्या प्रकरणात गुजरातांतल्या 9 जाणांक अटक करुन तांचे कडल्यान 17 मोबायल फोन, लॅपटॉप आनी हेर सामान जप्त केलें.
अटक केल्ल्या दुबावितां मदीं तिलोककुमार एम चेथानी (41, रा. सरदारनगर अहमदाबाद), रॉकी करमचंद तलरेजा (35, रा. सरदारनगर अहमदाबाद), पवणकुमार मुर्लीधर मंगलानी (45, रा. कुबेरनगर अहमदाबाद), किशन सुशील लालवानी (24, रा. सरदारनगर अहमदाबाद), गोपलानी सतीशकुमार भरत (38, रा. कुबेरनगर अहमदाबाद), दिनेश गोर्धंदा भाटिया (47, रा. नरोदा अहमदाबाद), नगेश चंदरलाल गेलवानी (35, रा. नरोदा अहमदाबाद), रिंकूकुमार पराषोतम चौथानी (30, रा. नोबलेनगर अहमदाबाद) व मनिष चंदरलाल रामचंदानी (37, रा. कुबेरनगर अहमदाबाद) हांचो आस्पाव आसा.
ही कारवाय आयतारा 21 तारखेक किंग्स इलेव्हन पंजाब आनी गुजरात टायटन्स हांचे मदीं जाल्ल्या इंडियन प्रिमियर लीग क्रिकेट मॅची वेळार पुलिसांनी केली. उत्तर गोंय जिल्हो गुप्तचर पंगडाक आनावाडा कांदोळेच्या क्रेसेंट व्हिलांत आयपीएल बेटिंग चालू आसा अशी म्हायती मेळ्ळी.
ते प्रमाण पुलीस अधीक्षक अक्षत कौशल, निरिक्षक जतीन पोतदार, परेश नायक, उपनिरिक्षक विशाल मांद्रेकार, हरीश वायंगणकार आनी सहकारी पुलिसांनी उल्लेख केल्ल्या व्हिलाचेर धाड घाली. तेन्ना क्रिकेट मॅचीचेर बेटिंग लावपाचे काम सुरू आशिल्ले.
गोंय भौशीक जुगार प्रतिबंधक कायद्याच्या कलम 3 आनी 4, तशेंच भा.दं.सं. च्या कलम 420 आनी म्हायती आनी तंत्रज्ञान कायद्याच्या कलम 66 ड खाला पुलिसांनी गुन्यांव नोंद करून सगल्या दुबावितांक अटक केली. तशेंच एल लॅपटॉप, 17 मोबायल फोन आनी हेर सामान मेळून 4 लाखांचो म्हाल जप्त केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
