भांगरभूंय | प्रतिनिधी
समस्तीपूर, खबरां संस्था: वैजकी मळार एक अजाप करपा सारकी गजाल मुखार आयल्या. एके २८ वर्सां पिरायेचे बायलेक आपलो जीव वगडावचो पडलो. दोतोर हाजीर नाशिल्ल्यान कम्पावंडरान शस्त्रक्रिया केल्ल्यान हें सगळें घडलें. बिहारच्या समस्तीपूर जिल्ह्यांतल्या एका खाजगी क्लिनिकांत शेनवारा एके बायलेक मरण आयलें. बबिता देवीच्या मरणा उपरांत तिच्या कुटुंबियांनी बरोच बोवाळ केलो. ‘आपलें आतां धड ना हें कळटांत कम्पावंड थंयच्यान पळ्ळो. ताका धरपाक आतां पुलीस विवीध सुवातांचेर छापे मारतात.
बबिता देवी पाटण्या पसून ८० किलोमीटर अंतराचेर आशिल्ल्या मुसरीघारारी शारांतल्या वॉर्ड नंबर १४ त रावताली. शेनवारा सकाळीं पाटोरी रोडार आशिल्ल्या अनिशा हेल्थ केअर सेंटरांत बबिता देवीक हाडली. तेन्ना कम्पावंडर आनी हेर स्टाफान दोतोर क्लिनिकांत ना अशें तांकां सांगलें. उपरांत कम्पावंडरान आपूण नसबंदी शस्त्रक्रिया करपाक शकतां अशें तिच्या कुटुंबियांक पटोवन सांगलें आनी ती ऑपरेशनाक तयार जालीं, अशी म्हायती मुसरीघारारीचे पुलीस अधिकारी फैझुल अन्सारी हांणी दिली.
कुटुंबीयांची परवानगी घेनासतना दुसर्या क्लिनिकां व्हेली
बबिता देवीक सकाळीं ११ क ऑपरेशन थिएटरांत व्हेली. तिका सलायन चडयलें. मात एका वरांत तिची भलायकी इबाडूंक लागली. उपरांत तिका थंयच्यान १० किलोमीटर अंतराचेर आशिल्ल्या दुसर्या खाजगी क्लिनिकांत व्हेली. हे खातीर तिच्या कुटुंबीयांची परवानगी घेवंक ना. दुसर्या क्लिनीकांत तिका मरण आयिल्ल्याचें सांगलें. उपरांत तिची कूड मूळ क्लिनिकांत हाडली अशें अन्सारी हांणी सांगलें.
स्टाफा आड एफआयआर
बबिता देवीक मरण आयिल्ल्याचें समजल्या उपरांत तिच्या कुटुंबियांनी अनिषा हेल्थ केअर सेंटर भायर आंदोलन सुरु केलें. क्लिनिकचे धनी आनी दोतोरांक अटक करपाची मागणी केली. कारण तिची सर्जरी करप अपेक्षीत आशिल्लें. दोतोर आनी क्लिनिकांतल्या हेर स्टाफा आड एफआयआर नोंद केल्या. फुडलो तपास चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
