भांगरभूंय | प्रतिनिधी
पणजीः गोंयचे पर्यावरण आनी अस्मिताय राखपाचें उतर दिवन गोंय प्रदेश काँग्रेस समितीन आयतारा लोकसभा वेंचणुके खातीर 21 वचनां सयत जाहीरनामो उजवाडायला.
गोवा प्रदेश काँग्रेस समितीचे अध्यक्ष अमित पाटकार हांचे वांगडा विरोधी फुडारी युरी आलेमांव, आमदार एल्टन डिकोस्ता, उत्तर गोंयचो उमेदवार एड. रमाकांत खलप आनी दक्षीण गोंयचो उमेदवार कॅप्टन विरियातो फर्नांडीस हांणी जाहीरनामो प्रसिद्ध करून केंद्रांत सरकार जातकच जाहीरनामो चालीक लायतले अशें सांगलें.
‘भ्रश्टाचार, ड्रग्साचो वेपार, शिंदळकी धंदो आनी हेर गजालींक लागून गोंयची वळख इबाडपाक लागल्या असो भंय राज्यांतल्या लोकांक आसा. पूण आमचे दोनूय उमेदवार लोकसभेंत हे प्रस्न मांडटले आनी ते सुटावे करतले अशें आमी तुमकां उतर दितात अशें पाटकार हांणी सांगलें.
पर्यावरण, रान, रानवटी जनावर आनी म्हादय न्हंयची राखण करप खूब गरजेचें अशें पाटकार हांणी सांगलें. ह्या म्हत्वाच्या गजालींची राखण करपाक भाजपा सरकार अपेस आयलां. तशेंच रोजगार निर्माण करपाक अपेस आयलां आनी ह्या मुखेल प्रस्नांचेर लक्ष वळोवपा खातीर म्हामार्ग बांदल्यात अशें ते सांगतात. तांणी हो म्हामार्ग कोळशाच्या येरादारी खातीर बांदला, राज्याच्या हिताक लागून न्हय असो आरोप पाटकार हांणी केलो.
कोळशाची येरादारी बंद करप हें आपलें प्राधान्य आसतलें अशें तांणी सांगलें. पूण कायदेशीर खणकाम परतून सुरू करपा खातीर बेगोबेग पावलां उबारतले हाची खात्री आमी दितात अशें तांणी सांगलें. खणकाम बंद जाल्ल्यान जायत्यो नोकऱ्यो आनी वेवसायूय ना जाले अशें तांणी सांगलें. आमी रोजगार निर्माण करतले, देखून थळाव्या तरणाट्यांक उत्पन्नाचो स्रोत मेळटलो अशें तांणी सांगलें.
गोंय पर्यटन क्षेत्राचेर आदारून आशिल्ल्यान पर्यटन उद्देगाक पुनरुज्जीवन करप गरजेचें आसा अशें पाटकार हांणी सांगलें. दर्यावेळो आनी थंयच्या लोकांच्या हिताची राखण करतले आनी आमच्या लोकांक दोट्टी नागरीकत्व मेळटले मेरेन आमी ओसीआय सुविधा चालू दवरतले अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
