भांगरभूंय | प्रतिनिधी
वाळपय, प्रतिनिधी: सत्तरी म्हालांतल्या नगरगांव पंचायत वाठारांतल्या नानोडा, कोदाळ, सांट्रें, खुर्द सांट्रें ह्या गांवांनी शेनवारा दिसभर लायट नाशिल्ली. ताका लागून तिडकल्ल्या थळाव्या तरणाट्यांनी वाळपय वीज कार्यालयाच्या सबस्टेशनाचेर मोर्चा व्हेलो. ताका लागून हे विशीं विशेश दखल घेवन कार्यालयाक विजेची पुरवण करची पडली. १६ वरां नाशिल्ली लायट फकत अर्द्या वरान आयली. ताका लागून अधिकार्यांनी हे विशीं आळस केल्ल्याचें स्पश्ट जालां. गोंय सरकाराच्या वीज खात्याच्या ह्या गैरवेवस्थापनाचेर नागरिकांनी खर राग उक्तायला.
हे विशीं म्हायती अशी, शेनवारा नानोडा, कोदाळ, सांट्रें ह्या वाठारांत लायट नाशिल्ली. सध्या भुरग्यांच्यो परीक्षा सुरू आसात. ताका लागून हाचो परिणाम भुरग्यांचे परिक्षेचेर जाता. तशेंच सध्या उश्णतायेचें प्रमाण वाडत आसा. हाचोय नागरिकांक त्रास जाता. लायटीची जायते फावट मागणी करून लेगीत वीज खात्याच्या अधिकार्यांनी काना मनार घेवंक ना. निमाणें रातच्या १० वरांचेर थळाव्या तरणाट्यांक वाळपय वीज कार्यालयाचेर मोर्चा व्हरचो पडलो. रातच्या सुमार धा वरांचेर ५० परस चड तरणाट्यांनी वाळपयच्या वीज कार्यालयाच्या सब स्टेशनार मोर्चा व्हरून थळाव्या अधिकार्यांक धारेर धरले. जो मेरेन गांवांनी लायट येना तो मेरेन सबस्टेशना वयले हालचे ना अशी शिटकावणी तरणाट्यांनी वीज अधिकार्यांक दिली. निमाणें हाजीर आशिल्ल्या कर्मचार्यांनी घडणुके सुवातेर वचून अर्द वरान वीज पुरवण केली.
ह्या वाठारांतल्या ट्रान्सफॉर्मर केंद्राचेर मात्शे काम करपाचें आशिल्लें. अर्द वरान हो मोडिल्लो ट्रान्सफोर्मर सारको करून गांवानी लायट आयली.
हे विशीं हांगच्या नागरिकांनी खर तिडक उक्तायला. १६ वरां त्रास सोंसले फकत अर्द वराच्या कामा खातीर. हाचे वयल्यान वीज खात्याचें प्रशासन कितलें भ्रश्ट आसा हें सिद्ध जालां, असो आरोप हांगच्या तरणाट्यांनी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
