भांगरभूंय | प्रतिनिधी
पणजी, प्रतिनिधी: शेनवारा सकाळीं ८.३० ते आयतारा सकाळीं ८.३० मेरेन राज्यांतल्या दोनूय जिल्ह्यांनी सरासरी ०.९९ इंच पावस पडला. उत्तर गोंयांत १.२२ इंच आनी दक्षिणेक ०.७९ इंच पावसाची नोंद जाल्या. २२ आनी २३ एप्रिलाक बारीक पावस पडपाची शक्यताय हवामान खात्यान उक्तायल्या. आयज मध्यम पावस पडपाची शक्यताय आसा. ते प्रमाण येलो अलर्ट जारी केला.
पणजे २४ वरांत सगळ्यांत चड ३.६९ इंच पावस पडला. ताचे उपरांत फोंडें १.८० इंच, पोरणें गोंयां १.५२ इंच, मुरगांवां १.३७ इंच, केपें १.१५ इंच, वाळपाय ०.७१ इंच, सांग्यांर ०.७२ इंच, मडगांवां ०.२४ इंच, सांखळे ०.२२ इंच, काणकोणां ०.१४ इंच आनी म्हापश्यां ०.०८ इंच पावस पडला. राज्यांत १ मार्च ते २१ एप्रील ह्या काळांत सरासरी १.१० इंच पावस पडला. हो पावस सामान्य सरासरी परस २४१ टक्के चड आसा.
आयतारा राज्यांतल्या तापमानांत उणाव
पणजेचें चडांत चड तापमान ४.२ अंश उणें जाल्यार मुरगांवां चडांत चड तापमान ३.८ अंश उणें जालां. मुरगांवां आयतारा चडांत चड तापमान २९.५ आनी पणजे २९.४ अंश सेल्सियस नोंद जालें. हवामान खात्यान २३ एप्रील मेरेन चडांत चड तापमान ३४ अंश सेल्सियस मेरेन वाडटलें असो अदमास काडला. २४ ते २७ एप्रील ह्या काळांत वातावरण सुकें उरपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
