भांगरभूंय | प्रतिनिधी
लंडन, खबरां संस्था: ब्रिटनाचे प्रधानमंत्री ऋषि सुनक हांणी आनीक एक खर कायदो हाडला. भारतांत बँकेचे एफडी, शेअर मार्केट आनी भाड्याच्या उत्पन्नाचेर बिगर निवासी भारतीयांक (एनआरआय) कर सुट १५ वर्सां वयल्यान ४ वर्सां मेरेन उणी केल्या. ब्रिटनांत रावपाच्या पांचव्या वर्सा सावन एनआरआय भारतीयांक भारतांतल्या येणावळीचेर ५०% कर भरचो पडटलो.
आतां मेरेन बिगर निवासी भारतीयांक फकत ब्रिटनांतल्या उत्पन्नाचेर १५ वर्सां कर भरचो पडटालो. फुडल्या वर्सा एप्रील सावन हो नवो कायदो लागू जातलो. नव्या नेमा उपरांत ब्रिटनांत रावपी पांच लाख प्रवासी भारतीयांतले सुमार ५० हजार दुबय वचपाचे आसात अशें लंडनांतले कर सल्लागार सौरभ जेटली हांणी सांगलें.
दुबयंत वयक्तीक कर दर शून्य आनी कॉर्पोरेट कर फकत ९% आसा. लंडनांत वसणूक कर ४०% जाल्यार दुबय प्रवासी भारतीयांचेर वसणूक कर शून्य आसा. जेटलीच्या म्हणण्या प्रमाण सुनकाच्या नव्या कायद्या उपरांत बिगर निवासी भारतीयांक ब्रिटनांत वेवसाय करपाक त्रास जावपाक लागल्यात.
८३ हजार भारतीयांनी ब्रिटीश नागरीकत्व घेतलें
फाटल्या पांच वर्सांत ८३ हजार ४६८ भारतीयांनी भारतीय नागरीकत्व सोडून ब्रिटीश नागरीकत्व घेतलां. युरोपांतल्या खंयच्याय देशा परस हें सगळ्यांत चड प्रमाण आसा. हाचे आदीं २०२२ मेरेन गोल्डन व्हिसा येवजणे खाला २५४ गिरेस्त भारतीयांनी ब्रिटीश नागरिकत्व मेळयल्लें.
भारतीय पुजार्यांक व्हिसा ना: ब्रिटनांतलीं ५० देवळां बंद, मूळचे भारतीय पीएम ऋषि सुनक हांचेर भारतीय रागार!
मूळ भारतांतले ब्रिटनचे प्रधानमंत्री ऋषी सुनक हांचे आड ब्रिटनांत रावपी हिंदू लोकांची तिडक वाडत आसा. सुनक सरकार भारतीय पुरयतांक व्हिसा दिना. हाका लागून ब्रिटनांतल्या सुमार ५०० देवळां मदलीं ५० देवळां बंद जाल्यांत.
ऋषी सुनक हांणी म्हणलें, देशाची लोकशाय धोक्यांत आसा. कांय शक्ती देशाची संस्कृताय आनी लोकशाय नश्ट करपाक सोदतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
