भांगरभूंय | प्रतिनिधी
कोलकाता, खबरां संस्था: देशांतल्या चडश्या राज्यांनी उश्णतायेक लागून लोकांक बरेच त्रास सोंसचे पडटात. खुबशे लोक हे उश्णतायेच्या चपक्यांत सांपडून दुयेंत पडल्यात. दिल्ली, उत्तर प्रदेश, अस्तंत बंगाला सयत उत्तरेंतल्या जायत्या राज्यांनी तापमान ३५ अंशांच्या फुडें पावलां. अस्तंत बंगालांत शेनवारा उश्णतेचें ल्हार आयिल्ल्याचें पळोवपाक मेळ्ळें.
मजगतीं, डीडी बांगलाची (दूरदर्शन बंगाल) अँकर (वृत्तनिवेदक) लोपामुद्रा सिन्हा बातम्यो वाचतना बेशुद्ध जाली. उश्णतायेची बातमी वाचतनाच तिका घुंवळ आयली. लोपामुद्रा बातम्यो वाचतना बेशुद्ध जाल्ल्याचो व्हिडिओ सध्या समाजमाध्यमांचेर व्हायरल जाला. उपरांत लोपामुद्रा हांणी स्वता फेसबूकाचेर लायव्ह येवन शेनवारा दूरदर्शनच्या स्टुडिओंत कितें घडलें हाची म्हायती दिली.
लोपामुद्रा सिन्हा हांणी फेसबूक पोस्टांत म्हणलां, लायव्ह बातम्यो वाचतना म्हजो बिपी उणो जाल्ल्यान हांव बेशुद्ध जाली. फाटल्या कांय दिसां सावन म्हजी भलायकी बरी ना. त्या दिसाय म्हाका बरें दिसनाशिल्लें. म्हाका दिसलें इल्लेंशें उदक पिल्यार म्हाका बरें दिसतलें म्हणून. हांव स्टुडिओंत केन्नाच उदक घेवन वचना. १० मिनटां खातीर हांव स्टुडिओंत वचून बातम्यो वाचतां वा अर्द वरा खातीर. म्हणून हांव केन्नाच उदक व्हरना पिवपाक. त्या दिसा हांव स्टुडिओंतल्या वेवस्थापकाक सिग्नल करून उदक हाडून दिवपाक सांगलें. मात तांणी उदक हाडचे पयलींच हांव बातम्यो वाचतनाच बेशुद्ध जालीं, अशें तिणें सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
