भांगरभूंय | प्रतिनिधी
पणजी, प्रतिनिधी: गोंयांत जायतीं वर्सां जालीं भाजपा सरकार आसा. थंयच्या क्रिस्तांव समाजान आमकां सदांच तेंको दिला. तांचे मजतीन आनी सहकार्यानूच गोंयांत एक दशक आमचें सरकार आशिल्ल्याचें मत प्रधानमंत्री नरेंद्र मोदी हांणी उक्तायलें. राष्ट्रीय खबरां चॅनलाचेर उलयतना तांणी हें विधान केलें.
ईशान्ये कडल्या राज्यांनी चडशे क्रिस्तांव मतदार चड आसात. तांच्याच मतांक लागून थंयसरूय आमचें सरकार येता. थंय आमचे कांय मुख्यमंत्री वा हेर मंत्री हे क्रिस्तांव समाजाचे आसात. केरळांत बूथ पसून व्हडल्या पांवड्यार आमचे फुडारी आसात. क्रिस्तांव समाजाचे फुडारी वा बिशप हांकां हांव जायते फावट मेळतूच आसतां. हांव स्वता क्रिस्ती परबो मनयतां.
हांवें व्हॅटीकन हांगा होली पोपांक भेट दिल्ली. तांकां आमी केल्ल्या कामांची म्हायती दिल्या. ताका लागून क्रिस्तांव समाज आमचे वांगडा ना असो आरोप हांव त्या समाजाचेर करपाक शकना. आमकां कांय प्रमाणांत चड यत्न करचे पडटले ते आमी करतात. तशेंच आमी दर्यादेग वाठारांतल्या नुस्तेंमार समाजा खातीरूय विवीध कामां करतात. ब्ल्यू इकॉनोमीचो तांकां फायदो जावचे खातीर आमी यत्न करतात, अशें प्रधानमंत्र्यानी सांगलें.
मजगतीं, आदीं कार्डिनल फिलिप नेरी फेर्रांव हांणी कांय दिसां आदीं गोंयच्या क्रिस्तांव मतदारांनी धर्मनिरपेक्ष आनी संविधानाचीं मुल्यां जपपी उमेदवारांक मत दिवपाचो उलो मारिल्लो. मुख्यमंत्री डॉ. प्रमोद सावंत हांणी ह्या आवाहनाक येवकार दिल्लो. कॉंग्रेसी परस भाजप होच धर्मनिरपेक्ष पक्ष आशिल्ल्यान कार्डिनल हांणी केल्ल्या वक्तव्याचो भाजपाक फायदो जातलो असो दावो मुख्यमंत्र्यान केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
