भांगरभूंय | प्रतिनिधी
मडगांव, प्रतिनिधी : पांझरखणी- कुंकळ्ळ्यां रस्त्या वयल्यान वचपी लॉरेन्सा फर्नांडीस (रा. आंबेली) हे ९० वर्सां पिरायेचे बायलेक एका अनवळखी वाहनान धपको दिलो. अपघाता उपरांत ह्या वाहनान घडणुके सुवाते वयल्यान पळ काडलो. कुंकळ्ळें पुलीस फुडलो तपास करतात.
मेळिल्ले म्हायती प्रमाण, पांझरखणी कुंकळ्ळ्यां आयतारा सकाळीं ही अपघाताची घडणूक घडली. लॉरेन्सा ही फांतोडेर सुमार साडे पांच वरांचेर चलत वताली तेन्ना अनवळखी वाहनान तिका धपको दिलो. अनवळखी वाहनान दिल्ल्या धपक्यांत लॉरेन्सा हिका गंभीर दुखापत जाली. मात धपको दिल्ल्या वाहन चालकान तिका हॉस्पिटलांत व्हरनासतना थंयच्यान पळ काडलो.
एका वाहन चालकां कडल्यान कुंकळ्ळी पुलिसांक अपघाताची म्हायती मेळटांच पुलीस घडणुके सुवातेर आयले. तांणी पळोवणी करून पंचनामो केलो. लॉरेन्साची मानसीक स्थिती सारकी नाशिल्ली. हाका लागून ती चलतना हो अपघात घडिल्ल्याची शक्यताय आसा. पुलीस निरीक्षक डायगो ग्रॅसियस हांच्या मार्गदर्शनाखाला फुडलो तपास चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
