राजस्थानची घडणूक: लग्नांतल्यान परततना जाल्ल्या अपघातांत णव इश्टांक जाग्यारूच मरण
भांगरभूंय | प्रतिनिधी
झालावाड, खबरां संस्था: राजस्थानाच्या झालावाड जिल्ह्यांत ट्रॉली आनी व्हॅन हांचे मदीं जाल्ल्या अपघातांत णव इश्टांक जाग्यारूच मरण आयलें. व्हॅनींत १० जाण आशिल्ले आनी ते मध्य प्रदेशांतल्या डुंगरी (खिलचीपूर) हांगा जाल्लो लग्न सुवाळो करून परतताले.
शेनवारा फांतोडेर ३ वरांचेर भोपाळ रस्त्यार हो अपघात जालो. अपघाताची म्हायती मेळटांच पुलिसांनी व्हॅनींत आडकल्ल्या जखमींक लागींच्या भलायकी केंद्रांत व्हेले. दोतोरांनी ९ जाणांक मरण आयिल्ल्याचें जाहीर केलें. एकल्या जखमीचेर उपचार सुरू आसात.
पुलिसांनी बर्याच त्रासांनी मरण आयिल्ल्यो कुडी व्हॅनी भायर काडल्यो. अकलेरा शारांतल्या एका घरांत लग्न सुवाळो आशिल्लो. हे सगळे इश्ट थंयच्यान परतताले. ह्या वेळार मारुती व्हॅन आनी ट्रॉलीन एकामेकाक सामकार धपको दिलो. हो अपघात इतलो भिरांकूळ आशिल्लो, मरण आयिल्ल्यांची वळख लेगीत पटनाशिल्ली. मजगतीं, ट्रॉली चालकाक ताब्यांत घेतलो आनी ताची चवकशी केली.
ह्या अपघातांत अशोक कुमार (२४), रोहित बागरी (१६), हेमराज बागरी(३३) , सोनू बागरी (२२), दीपक बागरी (२४), रविशंकर बागरी (२५), रोहित बागरी (२२) आनी रामकृष्ण बागरी (२०), राहुल हांकां मरण आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
