भांगरभूंय | प्रतिनिधी
वॉशिंग्टन, खबरां संस्था ः अमेरिकेच्या ‘डार्क वेब मार्केटप्लेस’ (US Dark Web Marketplace) ह्या संकेतस्थळा वयल्यान ड्रग्स रॅकेट चलोवपाच्या प्रकरणांत एका भारतीय नागरिकाक 5 वर्सां बंदखणीची ख्यास्त फर्मायल्या. तशेंच थंयच्या न्यायालयान ताचे 1.25 हजार कोटी रुपया जप्त करपाचे आदेश दिला. आरोपीचें नांव बनमीत सिंग (40) आनी तो उत्तराखंडांतल्या हल्द्वानी शारांत रावपी आसा.
अमेरिकेच्या अपीलाचेर एप्रिल 2019 वर्सा लंडनांत बनमीत सिंगाक अटक केल्ली. मार्च 2023 वर्सा ताका अमेरिकेंत प्रत्यार्पण केल्लो. ड्रग्साचो वेवसाय चलोवप आनी पयशे घेवपाचें कट रचोवप्याच्या प्रकरणांत ताका जानेवारींत दोशी थारायलो.
उत्तराखंडांतल्या हल्दवानी हांगाचो बनमीत सिंगान डार्क वेब मार्केटप्लेसाचेर मार्केटिंग साइट तयार करून Fentanyl, LSD, Ecstasy, Xanax, Ketamine आनी Tramadol सयत बंदी आशिल्ली वखदां विकली. गिरायकांनी ह्या सायटचो वापर करुन आनी क्रिप्टोकरंसी वरवीं पेमेंट करून बनमीत कडल्यान वखदां विकतीं घेतलीं. उपरांत सिंगान स्वता युरोपांतल्यान अमेरिकेंत अमेरिकेच्या मेल वा हेर शिपिंग सेवा वरवीं वखदां धाडपाची वेवस्था केली अशें न्यायालयाच्या कागदपत्रांत म्हणलां.
2012 ते जुलय 2017 ह्या काळांत बनमीत सिंगान अमेरिकेंत उण्यांत उणें आठ विक्री केंद्रां चलयलीं. तातूंत फ्लोरिडा, नॉर्थ कॅरोलिना, मेरीलँड, न्यूयॉर्क, नॉर्थ डकोटा आनी वॉशिंग्टन वेपारींचो आस्पाव आसा. ह्या वेपाऱ्यांक पयली ड्रग्ज मेळ्ळे. उपरांत ताणें कॅनडा, इंग्लंड, आयर्लंड, जमैका, स्कॉटलंड आनी अमेरिकेच्या व्हर्जिन जुंव्यांचेर अशा सगळ्या 50 राज्यांनी हीं वखदां वांटून दिलीं अशें न्यायालयाच्या कागदपत्रांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
