भांगरभूंय | प्रतिनिधी
हुबळी हत्या प्रकरणांतल्या दुबाविताच्या बापायची मागणी
हुबळी, खबरां संस्था : कर्नाटकांतल्या हुबळी शारांत काँग्रेस पक्षाचे नगरसेवक निरंजन हिरेमठ हिचे चलयेचो खून जाले उपरांत कर्नाटकांतलें वातावरण गरम जालां. नेहाच्या कॉलेजींतलो विद्यार्थी फयाज हाच्या बापायन ताका सगळ्यांत खर ख्यास्त दिवची अशी मागणी केल्या. ताका लागून परत कोणूच बायलेक त्रास दिवपाचो यत्न करचो ना. अशा गुन्यांवांतल्या आरोपींचो एन्कावंटर (सोमतोच फारान मारप) करचो अशी मागणी कर्नाटकाचे कामगार मंत्री संतोष लाड हांणी केल्या. केंद्र आनी राज्य सरकारांनी अशें धोरण आंखचें अशीय मागणी तांणी केल्या.
नेहा मारपी दुबावीत फयाजाचो बापूय बाबासाहेब सुबानी सरकारी शाळेंत शिक्षक आसात. प्रसार माध्यमां कडेन उलयतना तांणी सांगलें, निरंजन हिरेमठ हांणी आपली धूव नेहाक म्हजो पूत फयाज त्रास दिता अशें सांगिल्लें. आयतारा सांजवेळा 6 वरांचेर फयाजाचे हे कृतीची म्हायती म्हाका मेळ्ळी. हें आयकून म्हाका धक्को बसलो. फयाजाक अशी ख्यास्त दिवची की परत कोणाकूच अशें कृत्य करपाचें धाडस जावचें ना. नेहा म्हजे चलये सारकी आशिल्ली. तिच्या कुटुंबाची हांव माफी मागतां.”
सुबानीन फुडें सांगलें, फयाजान सैन्यांत भरती जावचें अशें म्हाका दिसतालें. ते खातीर हांवें ताका जिमांत वचपाक प्रेरीत केल्लें. फाटलीं स वर्सां म्हजी बायल आनी हांव वेगळे जाल्यात. फयाज आवय वांगडा रावता. आमी निमाणे तीन म्हयन्यां आदीं उलयिल्लें. जेन्ना जेन्ना ताका पयशांची गरज आसताली तेन्ना तो म्हाका फोन करतालो. म्हज्या पुतान गुन्यांव केला हें हांव मान्य करतां. फयाज आनी नेहा हांचें अफेअर आशिल्लें. ताका तिचे कडेन लग्न जावपाची इत्सा आशिल्ली. पूण हांवें न्हयकार दिलो. हांवें अक्षरशा पांयां पडून तिचो नाद सोडपाची विनवणी ताका केल्ली.
हिरेमठ हांकां लव जिहादाचो दुबाव
नेहा हिरेमठाचो बापूय निरंजन हांणी ह्या प्रकरणांत लव्ह जिहादाचो दुबाव उक्तायला. ताणें म्हणलें, आयचे तरणाटे चुकीच्या मार्गार कशे चलतात? हाची आमकां कल्पना ना. तशेंच समाजांत लव्ह जिहाद नेटान पातळत आसा.
एन्कावंटर करात
कर्नाटकाचे कामगार मंत्री संतोष लाड हांणी हे घडणुकेचो निशेध करून ह्या प्रकरणांत राजकारण करचें न्हय अशें आवाहन केलां. पूण सरकाराक अशा गुन्यांवकारांचो सरळ एन्कावंटर करचें अशें तांणी सांगलें. ही कृती अमानवीय आसून चलयेच्या आवय-बापायक व्हड दुख्ख दिवपी आसा. ते खातीर केंद्र आनी राज्य सरकारांनी एक धोरण आखून अशा गुन्यांवकारांक जिवेशीं मारचे अशी विनवणी करतां, जाका लागून फुडाराक असल्यो घडणुको परतून घडच्यो नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
