एके चुकीक लागून…

भांगरभूंय | प्रतिनिधी

हाचे आदीं मरण आयिल्ल्या लायनमनांच्या बायलांक, भावांक नोकरी दिवपाचें आस्वासन वीज मंत्र्यान पसून दिल्ल्याचें छापून आयलां. त्यो दिल्यात काय नात, तें कळना.

दिवचले आयटीआय लागसार काल वीज लायनमनाक शाॅक लागून मरण आयलें. ही घडणूक सगल्यांचें काळीज हालोवन गेली. कोणाचे तरी चुकी खातीर मनोज जांबावलीकार ह्या 34 वर्सांच्या तरणाट्याक जीव व्हगडावचो पडलो. दुरुस्ती कामा वेळार वीजपुरवण अचकीत सुरू जाल्ल्यान ही दुर्घटना घडली. मात, हो वीज प्रवाह इन्व्हर्टराचो अशें मुख्य वीज अभियंत्याचें मत. वीज पुरवण बंद करून दुरुस्ती करपाक खांब्यार चडलो आनी लागीं खंयूय इन्व्हर्टर चालू आसल्यार शाॅक येता, पूण तो इतलो खर आसता, हें वीज कामगारांकूच खबर आसतलें. अभियंत्याच्या मतान लायट गेल्या म्हूण एका आस्थापनांत इन्व्हर्टर सुरू करतकच खिणा भितर लागींच काम करपी मनोजाक शाॅक बसलो.
हालींच्या वर्सभराच्या काळांत दुरुस्तीचें काम करतना 15 वीज कामगारांक मरण आयलां. दिकरपाले खांब्याचेर रंग मारतना एका कामगाराक वीज पुरवण सुरू जावन मरण आयिल्ले. तर नोव्हेंबरांत वळपें- विर्नोड्यां लाडू आरोंदेकार संवसाराक अंतरिल्ले. ताचे पयलीं शिवोले कृष्णा पवार हांकांय काम करतना विजेची पुरवण चालू जाल्ल्यान मरण आयिल्लें. उदय नायक हांकां मोरजे मार्चांत मरण आयिल्लें. दिवचलेच कांय म्हयने पयलीं बाबू नावाच्या वीज कामगाराक जीव व्हगडावचो पडिल्लो. काम करतना मदींच वीज पुरवण चालू जावपाचे प्रकार 1980 च्या दसकांत पसून जाल्यात. त्या वेळार लायनमन गंभीर जखमी जाल्यात. चडशे पिरायेची चाळीशी हुपूंक नाशिल्ले. दिवचलचे कालचे घडणुकेंत दुरुस्ती करचे पयलीं सगली जतनाय घेतिल्ली, अशें मुख्य वीज अभियंते म्हणटात. ट्रान्स्फरमर बंद केल्लो, वीज प्रवाह बंद केल्लो, पूर्ण आयझोलेशन केल्लें. खांब्यार चडून मनोजान तिनूय फेसीचें काम केलें. पूण न्युट्रल सरयेक हात लागतकच ताका शाॅक लागलो. तातूंत इन्व्हर्टराचो प्रवाह खेळटालो. ज्युनियर अभियंत्यांच्या पंगडान चवकशी करून हो निश्कर्श काडला. लागींच्या एका आस्थापनाच्या इन्व्हर्टराचें कनेक्शन सारकें नाशिल्लें. ताणें अर्थींग करूंक नाशिल्लें. न्युट्रलाचो प्रवाह वीज खात्याचे सरयेंत पाविल्लो, अशें अभियंतो म्हणटा.
तरीय वीज खात्यान आपल्या कामगाराचे सुरक्षे खातीर शक्य ते सगले उपाय घेवपाक जाय आसले. गोंयांत वीज वितरण वेवस्था सुदारपाक सरकारान फाटल्या पांच वर्सांच्या काळांत 12 हजार कोटी रुपया खर्च केल्यात. ही म्हायती खुद्द वीज मंत्री सुदिन ढवळीकार हांणी विधानसभेंत दिल्या. इतलो खर्च करून लेगीत जर कामगारांक मरण येता जाल्यार ही गंभीर गजाल म्हणची पडटली. लायट गेली काय लायनमन फोन करतकच रोखडेच येतात. हो फोन मात लागपाक जाय. कारण बरेच खेपे तो एंगेज्ड मेळटा. लायनमन येतात खरे, पूण तांचे कडेन निसण आसना. ग्लाॅवज, गमबूट, हेल्मेट आसना. सांगल्यार फट दिसतलें, पूण कांय वेळार करंट येता तो तपासपाक टेस्टरुय आसना. आसल्यार तो सारको चलना. पयलीं ते सायकलींनी येताले. आतां स्वताची दुचाकी घेवन येतात. केन्नाय खात्याचो टेंपो घेवन. ह्या कामगारांचे सुरक्षे खातीर वीज खातें दरवर्सा नेमके कितले पयशे मोडटा आसतलें काय? खरें म्हणल्यार कामगार म्हणल्यार वीज खात्याची रक्तवाहिनी. तांची जतनाय प्राधान्यक्रमान घेवपाक जाय. तांकां खंयचेच परिस्थितींत असुरक्षीतताय दिसपाक जायना. दुरुस्तीचें काम चलता तेन्ना ट्रान्स्फाॅर्मरांचो स्वीच बंद करून फ्यूज काडून व्हरपाक जाय. काम जातकच लायनमनानूच परत वीज पुरवण सुरू करपाक जाय. असो नेम केल्यार वीज दुर्घटना उण्यो जातल्यो. मात जनरेटर, इन्व्हर्टराचें कितें?
आदल्या तेंपार आनी आयजूय जनरेटर वापरपी लोक उणे. व्हडलीं आस्थापनांच तो वापरतात. ते खातीर वीज खात्याची परवानगी घेवन योग्य पद्दतीन तो बसोवचो पडटा. आतां इन्व्हर्टर घराघरांनी जाल्यात. लायट गेली काय ते सुरू जातात. ताका न्युट्रल वीज खात्याचें वापरप चल्लां. ते कसलीच परवानगी घेनात. लोकांचें सोडात, पूण इन्व्हर्टर बसोवन दिवपीय परवानगी घेनात, असो आरोप मुख्य वीज अभियंत्यान केलो. लोकांनी आतां हाचेर पावलां उखलपाक जाय. कारण अशे जर करंट खांब्या वयल्या सरयांनी पावपाक लागले जाल्यार वीज कामगारांचेर हावळ येतली. मनोज जांबावलीकाराक देड वर्साचें भुरगें आसा. ताचे घरकान्नीक नोकरी दिवपाक वीज खात्यान पावलां उखलपाक जाय. हाचे आदीं मरण आयिल्ल्या लायनमनांच्या बायलांक, भावांक नोकरी दिवपाचें आस्वासन वीज मंत्र्यान पसून दिल्ल्याचें छापून आयलां. त्यो दिल्यात काय नात, तें कळना. पूण कोणाचे तरी चुकी खातीर एक संवसार उध्वस्त जाता, तेन्ना तो परत उबो करप सगल्यांची लागणूक. गेल्लो मनीस परत येना, पूण ताचे फाटल्यान उरिल्ल्यांक जे मनस्ताप सोंसचे पडटात, तें तांचे तांकांच खबर.