भांगरभूंय | प्रतिनिधी
गोंयांत गाडयो वाडल्यात हें आतां आनीक सांगपाची गरज ना. गोंयची जितली लोकसंख्या आसा, तितल्योच गोंयांत गाडयो आसात. सगल्योच गाडयो एकाच वेळार रस्त्यार येनात. पूण राज्यांतल्यो आनी भायल्यो ज्यो गाडयो चलतात, तांचे पार्किंगेचो प्रस्न अक्षरशा प्रत्येक ल्हान- व्हड शारांनी ड्रायव्हरांक सतायता. तातूंत गोंयचे भोवतेक रस्ते अशीर. रुंद रस्ते पसून दोनूय वटांनी गाडयो पार्क केल्यो काय अशीर जातात आनी मागीर येरादारीची कोंयडी. भोवतेक पालिकांनी पे पार्कींग सुरू केलां. अर्थांत लोकांचो ताका विरोध आसा. पूण, व्हडल्या शारांनी लोक फावो तो दुडू फारीक करून पे पार्कींग सुविधेचो लाव घेतात. हाचो गैरफायदो आतां कांय पालिका घेवपाक लागल्यात, असो आरोप कांय एनजीओ आनी लोक करपाक लागल्यात. हालींच म्हापशें पालिकेन टॅक्सी स्टॅण्डा वयल्या पे पार्किंगेच्या मोलांत तीन पटींनी वाड केल्या. गिरायकांची ही लुटमार अशें मत उक्तावन गोवा कॅन संस्थेन नगरपालिका संचालनालया कडेन स्पश्टीकरण मागलां. तांच्या म्हणण्या प्रमाण, म्हापशेंचे दर खंय राजधानी पणजे परस चड म्हारग आसात!!
म्हापशें पालिकेन पोरूं टॅक्सी स्टॅण्ड आनी मार्केट वाठारांतल्या पे पार्किंगेचे दर थारायिल्ले. दर दोन वरां दुचाकी पार्क करपाक 10 रुपया आनी चारचाकीं खातीर 20 रुपया. तशी निविदा काडिल्ली. पोरूं आनी अंदूंय तांकां कोण बोलिदार मेळूंक ना. म्हणटकच पालिकेचे कर्मचारीच हें शुल्क वसूल करतात. म्हापशें टॅक्सी स्टॅण्डार दोन वरां खातीर चार चाकी गाडयेक 60 रुपया घेतात. ह्या सोमाराच्यान ही दरवाड लागू केल्या. ही दरवाडीची म्हायती कळंगूटचे जागरूक नागरीक अँथनी डिसोझा हांणी गोवा कॅनाक सांगली. हरशीं कोणाक जाय त्यो भानगडी म्हणीत कोण कागाळ बी करपाक वचनात. सोशल मिडियाचेर मात वाग जावन शाणपणां सांगतात, बुदवंतकाय दाखयतात. पूण डिसोझा हाका आडवाद थारले. तांणी हाचे आड आवाज काडलो. संबंदीत सरकारी खात्यांक विस्वासांत घेनासतना रिक्षाचें, मोटारीचें भाडें वाडोवप, पार्किंगेचें शुल्क वाडोवप असले प्रकार जायते फावटी जातात. लोक आवाज काडिनात, म्हूण कोणाक कांय कळना.
पे पार्कींग ही सेवा काय वेवसाय हाचें स्पश्टीकरण दिवपाचे पालिकेक निर्देश दिवचे, पार्किंगे विशीं मार्गदर्शक तत्वां जारी करचीं, कागाळ निवारणा खातीर एक प्रणाली निश्चीत करपाचे आदेश पालिकेक दिवचे अशी मागणी गोवा कॅनान पालिका संचलनालया कडेन केल्या. पळोवया कितें जाता तें. विशेश म्हणल्यार पालिका मंडळान ही दरवाड करूंक ना. नगरसेवकांक हें खबर आसा काय ना, तांकांच खबर. अशे जर कोणूय दर वाडोवपाक लागलो तर तें चुकीचें न्हय? ह्या पे पार्किंगे फाटल्यान व्हड रॅकेट आसा, असो दुबाव थोड्या नागरिकांक आसा. हाचे फाटल्यान नेमके कोण आसात, ताचो सोद पालिका संचलनालयान घेवपाक जाय. कोण कागाळ करतलो म्हूण वाट पळोवपाक जायना. पोरण्या आनी नव्या कदंब बसस्टॅण्डाचेर पसून पे पार्कींग दर चारचाकीक 50 रुपया आनी दुचाकींक 20 रुपया इतले आसात. हेय राज्यांत म्हारगूच.
खरें म्हणल्यार सवाय भितर पे पार्कींग दवरिल्लें जाल्यार शारांत रस्त्या कुशीक गाडयो पार्क करपी सगलेच पयशे दिवपाचे. पूण पंदरा मिणटां रावल्यार 20 रुपया घेवप म्हारग. कांय कडेन तर गाडी भितर घेवन ओल्त मारून भायर काडली जाल्यारूय पार्कींग फी घेतात खंय. शक्य थंय लोकांक फुकट गाडी पार्क करपाक दिवंक जाय. पणजे शारा भायर पार्कींग प्लाझा बांदला. तो कितलिंशींच वर्सां रिकामीच आशिल्लो. हालीं- हालीं थंय गाडयो दिसतात. थंय गाडी पार्क करून मार्केटांत नुस्तें हाडपाक बी लोक वतले असो विचार तेन्ना तो बांदप्यान केल्लो आसतलो वा आशिकुशीच्या कार्यालयांनी येवपी लोक थंय गाडयो पार्क करतले, अशें चिंतिल्लें आसतलें. मात तो अजून धवो हती थारला. शारांनी पार्किंगेची समस्या आसा. हाचेर उपाय म्हणल्यार शारांतर्गत बशी सुरू करप, रस्ते रुंद करप. तातूंत स्मार्ट सिटी प्रकल्पा खाला कांय रस्ते अशीर केल्यात. सांतिनेज पीडब्ल्यूडी मुख्यालया कडेन ल्हान फुटपाथ रुंद केल्या. ताका लागून पार्क केल्ल्यो मोटारी देड ते दोन मिटर भायर रस्त्यार पावतात. परिणाम अशीर जाल्ल्या रस्त्याचेर दोनूय वटेनच्या गाडयांच्यो रांको.
म्हापशें जावं वा हेर कडेन पे पार्किंगेच्या वाडिल्ल्या दराचेर सरकारान कितें तरी उपाय काडपाक जाय. कारण गरज नासतना थंय काॅण्ट्रेक्टर, पालिका कर्मचारी, ड्रायव्हर हांचीं केस्तांवां जातात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
