भांगरभूंय | प्रतिनिधी
उणे न्हिदेक लागून जाता कामाचेर परिणाम
अमेरिका, खबरां संस्था: अमेरिकेंत न्हिदेक तितलें म्हत्व दिनात. हांगा न्हिदेक निश्क्रीयतायेचो काळ अशें म्हणटात. ताका लागून न्हिदे खातीर वेळ घेवचे परस तो वेळ कांय कामां खातीर वापरप पसंत करतात. हालींच गॅलपच्या सर्वेक्षणांतल्यान दिसून आयलां की न्हीद नाशिल्ल्यान अमेरिकन लोकांच्या कामाचेर परिणाम जावपाक लागला.
चडशा अमेरिकन लोकांच्या मता प्रमाण, न्हिदेक चड वेळ मेळ्ळो जाल्यार तांकां बरें दिसता. एका सर्वेक्षणांत ५७% अमेरिकन लोकांनी पयलेच खेपे आपल्याक चड न्हीद जाय अशें मान्य केलें. ४२% लोकांच्या मतान तांकां फावो ती न्हीद मेळटा. निमाणें खेपे २०१३ वर्सा नवें सर्वेक्षण जाल्लें तेन्ना तें सामकें उरफाटें आशिल्लें. हातूंत ५६% लोकांच्या मता प्रमाण तांकां फावो ती न्हीद मेळटा अशें नमूद केल्लें. सर्वेक्षणांत न्हिदेच्या काळा विशीं विचारलें तेन्ना फकत २६% लोकांनी आठ वरां वा ताचे परस चड न्हिदिल्ले अशें सांगलें. ५३% लोकांनी स ते सात वरां न्हीद घेतिल्ल्याचें सांगलें.
२०१३ च्या १४%चे तुळेंत २०% लोकांनी सांगलें, ते पांच वरां वा ताचे परस उणो वेळ न्हिदतात. तज्ञांच्या म्हणण्या प्रमाण न्हीद उणी जाल्ल्यान अमेरिकन लोकांचोय ताण वाडला. नव्या आंकड्यां प्रमाण ४९% अमेरिकन लोकांक सदांच ताण जाणवता. हो आंकडो फाटल्या दोन दशकांतलो सगळ्यांत चड आसा. चड न्हीद घेवपाची इत्सा आशिल्ल्या लोकां मदीं ६३% लोकांक चड ताण आशिल्ल्याचें दिसता. २०२३ त ४५% दादल्यांचे तुळेंत ५३% बायलांनी सेगीत ताणाचो अणभव घेतलो.
बायलांक फावो ती न्हीद मेळपाची शक्यताय उणी आसता
दादल्यां परस बायलांक फावो ती न्हीद मेळपाची शक्यताय उणी आसता. ४८% दादल्यांचे तुळेंत ३६% बायलांनी म्हणलें, तांकां जाय तितली न्हिद मेळटा म्हणून. हेे गॅलपच्या सर्वेक्षणांतले सगळ्यांत चड आंकडे जावन आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
