भांगरभूंय | प्रतिनिधी
मनशाची कूड सुमार 70% उदका पसून तयार जाल्ली आसता. पेशींक पोशण दिवपाक आनी कुडीचें तापमान नियंत्रीत करपाक उदक गरजेचें. उदक अन्नाचे विघटन आनी पोशक तत्वां शोशून घेवपाक मजत करता. हाचे भायर बद्धकोश्ठता सारकिल्ल्या समस्यांकय पयस दवरता. फावो तें उदक पियेल्यार कात हायड्रेटेड आनी तरणाटी उरता. ताका लागून सुरकुती उणी जाता आनी कातीचो रंग सुदारता. उदक कुडींतले कोयर काडून उडोवपाक मूत्रपिंडांक मजत करता.
हाका लागून किडनी स्टोन सारकिल्ल्या समस्यांचो धोको उणो जाता. 73% मेंदू उदका पसून तयार जाता. डिहायड्रेशनाक लागून मेंदवाचें कार्य उणे जावन तकली दुखूंक शकता. फावो तें उदक पियेल्यार मन तीक्ष्ण उरता आनी एकाग्रताय वाडता.
दर दिसा कितलें उदक पियेवचें?
दर दिसा मनशान कितलें उदक पियेवचें हें तुमचें वजन, पिराय, लिंग, तुमी कितले सक्रिय आसात, हवामान (गरम वा थंड) आनी भलायकी अशा जायत्या गजालींचेर आदारून आसता.
वजनाच्या आदारान दर दिसा कितलें उदक पियेवचें?
मेयो क्लिनिकाच्या म्हणण्या प्रमाण भलायकेन बऱ्या आशिल्ल्या प्रौढाक दर किलो कुडीच्या वजनाक दिसाक सुमार 35 मिलिलीटर उदकाची गरज आसता. म्हळ्यार जितलें चड वजन तितलें चड उदक पियेवपाची गरज आसा.
50 किलो वजनाच्या मनशान दिसाक सुमार 1.7 लिटर उदक पियेवचें.
60 किलो वजनाच्या मनशान दिसाक सुमार 2.1 लिटर उदक पियेवचें.
70 किलो वजनाच्या मनशान दिसाक सुमार 2.4 लिटर उदक पियेवचें.
80 किलो वजनाच्या मनशान दिसाक सुमार 2.8 लिटर उदक पियेवचें.
व्यायामा सारक्या जड शारिरीक क्रियाकलाप करपी वा उश्ण वाठारांनी रावपी लोकांक चड उदक पियेवची गरज आसा. तशेंच तुमच्या कुडीची तान लक्षांत घेवन तान लागतकच उदक पियेवचें. उदक पियेंवप गरजेचें आसाच तेच बरोबर उदका भायर हेर द्रव पदार्थांचो आस्पाव करचो. हर्बल च्या, दूद, शंबर टक्के फळांचो रोस आनी जेवणांतलें उदक कुडीक हायड्रेटेड दवरपाक मजत करतात.
आयुर्वेदांत सांगिल्ले उदक पियेवपाचे नेम…
० उदक भलायके खातीर बरें देखून प्रमाणा भायर उदक पियेवपाची गरज ना. आयुर्वेदाच्या मतान उदक पचना खातीर म्हत्वाचें.
० घाम येवप, बद्धकोश्ठता, तोंड सुकप आनी मुताचो हळदुवो रंग जाल्यार चड उदक पियेवचें.
० जेवणा पयलीं वा जेवणा उपरांत 30 मिनटांनी उदक पियेवचें.
० संधिवात आशिल्ल्या मनशान जेवणा उपरांत 30 मिनटांनी उदक पियेवचें आनी कफाचो त्रास आशिल्ल्या चड वजनाच्या मनशान जेवणा पयलीं 30 मिनटां उदक पियेवचें.
० उबे रावचे परस बसून उदक पियेवचें कारण अशें केल्यार उदक तुमच्या कुडीन चड बरें शोशून घेता.
० फ्रिजांतल्यान थंड उदक केन्नाच पियेवचें न्हय. कारण थंड उदकाक लागून तुमची पचन शक्त उणी जाता.
० उदक सांठोवपा खातीर माती वा तांबें वा उण्यांत उणें स्टीलची आयदनां वापरचीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
