इस्रायल- इराण पेट्टा?

भांगरभूंय | प्रतिनिधी

आखाती देशांनी लाखांनी भारतीय काम करतात. झूज जाल्यार तांचे कितें जातलें, हाचो विचार करचो. अर्थांत झुजा खातीर उंचाबळ जाल्ल्या देशांक हेरां विशीं कांय दिसना.

कांय देश फाटलो फुडलो विचार करिनासतना वागतात. दुसऱ्या देशांतल्या आनी आपल्याय नागरिकांचें तांकां पडून गेल्लें नासता. उखल्ली जीभ लायली ताळ्याक, म्हणटात तशी तांची कृती. फक्त उलोवप न्हय, तर तांची वागपाची तराय कांयशी तशीच आसता. इस्रायल, पॅलेस्टायनांत फाटले कांय म्हयनें जें कितें जालें, तातूंत पयली चूक हमासाची आशिल्ली. इस्रायलान पॅलेस्टायनाची जमीन बळकायल्या. तांच्या नागरिकांचे हालहाल केल्यात, ही गजाल सामकी खरी. पूण तांणी इस्रायलाचेर क्षेपणास्त्रां सोडून स्वताच्याच पांयांचेर कुराड मारून घेतली. परिणाम कितें जालो? लाखांनी निश्पाप पॅलेस्टीनी लोक, खास करून भुरगीं, बायलो मरणाचे धडेक लागलीं. इस्रायलीय मेले. अमेरिकेच्या तेंक्यान फुरफुरपी ह्या ल्हानशा, पूण बळिश्ट देशाचे वाटेक एकलोय पॅलेस्टायन समर्थक उक्तेपणी गेलो ना. लेबनानांतली हेजबुल्लाह, इराणान मात उक्तें समर्थन केलें. गुप्तपणान शस्त्रांय दिलीं. तिडकल्ल्या इस्रायलान सिरियांतल्या इराणी दुतावासाचेर हल्लो केलो. तातूंत कांय अधिकाऱ्यांक मरण आयलें. आंतरराष्ट्रीय कायद्या प्रमाण, तसो हल्लो करप सामकें चुकीचें. हल्ल्याच्या बाराव्या दिसा इराणान अचकीत इस्रायलाचेर ड्रोन आनी क्षेपणास्त्रां सोडून पुराय संवसाराक धपको दिला. अर्थांत हीं सगलीं शस्त्रां इस्रायलान हवेंतले हवेंत नश्ट केलीं. अमेरिका इस्रायलाची इश्ट आनी इराणाची कट्टर दुस्मान. तोय राग इराणाक आसतलोच.
इस्रायल सामको धाडशी. तशेंच वागपाक जाय. तांणी पॅलेस्टायनाचेर शेंकड्यांनी बाॅम्ब घाले. आमी तांचेच भशेन पाकिस्तानाचेर आनी चीनाचेर एक- एक अणुबाॅम्ब घालपाक जाय. इट का जबाब पत्थर से दिवपाक जाय….. अशे जायते व्हाॅट्सअॅप पदवीधर फुरफुरून म्हणटात. पूण प्रत्यक्षांत हें शक्य नासता. ताच्या परिणामांचो विचार करचो पडटा. इस्रायल एक आपलें तेंच खरें म्हणपी देश. ताणें इराणाच्या ह्या क्षेपणास्त्र हल्ल्याक जाप दिली जाल्यार झुजाची कीट पडूं येता… आनी तें सगल्यांकूच मारक थारतलें. खास करून आखाती देशांक. अमेरिका, ब्रिटन, कॅनडा, भारत, संयुक्त राष्ट्रांनीय इराणाच्या हल्ल्या विशीं हुस्को उक्तायला. भारतान दोनूय देशांक संयम पाळपाचो उलो मारला. मुत्सद्देगिरी, चर्चा करून प्रस्न सुटावो करचो, अशें मागलां. आखाती देशांनी सुरक्षा आनी थिरताय राखप सामकें म्हत्वाचें अशेंय भारतान म्हणलां. भारतीयांनी फुडल्यो सुचोवण्यो मेळटा मेरेन इराण, इस्रायलाक वच्चें न्हय, अशें कळीत केलां. सध्या थंय शेंकड्यांनी भारतीय कामा निमतान रावतात. तांकांय दुतावासा कडेन संपर्क दवरपाक सांगलां. तेवटेन इस्रायल समर्थक अमेरिकेनूय हुस्को उक्तायला. जी 7 आनी संयुक्त राष्ट्रांची बसका आपयल्या. कारण झूज पेटलें जाल्यार ताचो परिणाम अमेरिकेच्या अध्यक्षपदाचे वेंचणुकेचेर (उमेदवार- ज्यो बायडेन आनी डाॅनाल्ड ट्रम्प) जावं येता.
इराण- इस्रायला मदीं पेटलें जाल्यार सगल्यांत व्हडलो परिणाम इंधनाचेर जातलो. पॅट्रोलियम निर्गत करपी देशांचे संघटणेंत इराण हो कच्चें तेल काडपी तिसरो व्हडलो देश. आमचो देश संवसारांतलो तिसऱ्या क्रमांकाचो तेल आयात करपी देश. 80 टक्के तेल आमी भायल्यान हाडटात. इंधनाचें मोल वाडल्यार लोकांक त्रास जातलेच, पूण शॅर बाजार, चलन, विदेशी भागभांडवलाचेर परिणाम जातलो. इंधनाक लागून येरादारी उणी जाली जाल्यार अर्थवेवस्था, म्हाल येरादारीक फटको बसतलो. म्हारगाय वाडटली. ती वाडल्यार कितें जाता तें सांगपाक नाका. आयात- निर्गतीं मदीं संतुळा उरूंक नाशिल्ल्यान रुपया डाॅलराचे तुळेन आनीक दुबळो जातलो. निर्गत म्हारग जातली, घरगुती कंपनींचो फायदो देंवतलो. इराकान 2 आॅगस्ट 1990 दिसा कुवेटाचेर आक्रमण केल्लें. तेन्ना थंय रावपी शेंकड्यांनी गोंयकारांक नोकरी सोडून परत येवचें पडिल्लें. आतां इराण, इस्रायल आनी आखाती देशांनी लाखांनी भारतीय काम करतात. झूज जाल्यार तांचे कितें जातलें, हाचो विचार करचो. अर्थांत झुजा खातीर उंचाबळ जाल्ल्या देशांक हेरां विशीं कांय दिसना. भोगचें पडटा मात आशिकुशीच्या देशांक.
झूज पेटलें आनी भितर रशिया, अमेरिका, कोरिया, चीनान बी उडकी घेवपाचीं अपुरबुद्दपणां केलीं जाल्यार तिसरें म्हाझूज जावपाक वेळ लागचो ना. संयुक्त राष्ट्रांची बसका जातली, तातूंत खंयचो देश कितें भुमिका घेता, ताचेरुय खूब कितें अवलंबून आसतलें. मात, झूज टाळपाचे नदरेन सगल्यांनी पयलीं यत्न करूंक फावो, हेंय तितलेंच खरें. मनीसजात तिगपाक जाय, जाल्यार हें सामकें गरजेचें.