भांगरभूंय | प्रतिनिधी
जोशी मठ, खबरां संस्था ः उत्तराखंडांत जमनीचो उणाव आनी सरकारान योग्य रितीन पुनर्वसन करूंक नाशिल्ल्यान 16 म्हयने आपलो जीव धोक्यांत घालून जोशीमठांतल्यान भायर गेल्लीं 2016 कुटुंबां आपल्या मोडिल्ल्या घरांनी परतून आयल्यांत. जानेवारी 2023 चे सुरवेक जोशीमठांतल्या सुमार 1200 घरांक उदरगतीचे प्रकल्प उबारतना केल्ल्या स्फोटांक लागूंक तशेंच निर्माण जाल्ल्या सैमिक संकश्टांक लागून फटीं पडल्यो. कांय घरां पुरायपणान मोडून पडिल्लीं. हाचे उपरांत प्रशासनान 181 घरां रिती केल्लीं. फटींक लागून 800 परस चड घरांचेर तांबडो टॅग लायिल्लो आनी संबंदीत लोकांक तात्पुरतें शिबिरांनी दवरिल्ले. सुमार 200 कुटुंबांक तांच्या इबाडिल्ल्या घरांच्या बदलाक लुकसाण भरपाय मेळ्ळ्या. पूण जमनीचें मोल दिल्लें ना. जोशीमठा खातीर सरकाराक नवें पुनर्वसन धोरण तयार करपाक मेळूंक ना आनी जोशीमठा खातीर स्थिरीकरण येवजणेचेरूय काम सुरू जावंक ना.
भरपाय इतली उणी की जमीन विकत घेवप अशक्य
हरीशलाल हांणी सांगलें, तांकां 37.72 लाख रुपया लुकसाण भरपाय मेळ्ळी. इतल्या कमी पयशांनी ना जमीन मेळ्ळी ना घर मेळ्ळे. अषाणी देवी, अनिल, सुनील, हेमादेवी, नंदी देवी, गीत देवी, सीता देवी आपल्या मोडक्या घरांत परतून आयल्यात. तांच्या सगळ्यांच्या मतान आमच्या घरांत भिरांत आसा, पूण भितर रावपा बगर दुसरो पर्याय ना.
सरकारी भाडें मेळना, पोट कशें भरप?
अमरदेव हांणी म्हणले, हांव 11 म्हयने चमोली लागसार कोठियालसानांत भाड्यान रावलो, पूण आतां भाडें भरपाक पयशे नात. 11 म्हयने सरकारा कडल्यान भाडें मेळूंक ना. देवेश्वरी देवीन सांगलें, कुटुंबांत 6 वांगडी आसात ते म्हळ्यार घोव, दोन पूत, धुवो आनी नातू. आतां जोशीमठा भायर घर चलोवंक मेळना. म्हणून परत येवचें पडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
