भांगरभूंय | प्रतिनिधी
नवी दिल्ली, खबरां संस्था ः अमरनाथ यात्रा 29 जून सावन सुरू जाता. हे खेपे ही यात्रा 19 ऑगस्ट मेरेन म्हळ्यार 52 दीस चलतली. ताचे खातीर नोंदणी आयच्यान (15 एप्रील) सुरू जाल्या. सरकारी आदेशा प्रमाण 13 ते 70 वर्सां पिरायेच्या भारतीय नागरिकांक अमरनाथ यात्रा करपाक मेळटा. प्रवासाक जाय आशिल्लें वैजकी प्रमाणपत्र मेळोवपाची प्रक्रिया चालू आसा.
नोंदणी कशी करची?
आयच्यान (15 एप्रिल) ऑनलायन आनी ऑफलायन दोनूय पद्धतीन नोंदणी करपा मेळटा. ऑनलायन नोंदणी खातीर तुमी अमरनाथ बोर्डाच्या अधिकृत संकेतथळार लॉग इन करूंक शकतात. मोबायल एप्लिकेशन वरवीं नोंदणी करपाची आसल्यार श्री अमरनाथजी यात्रा अॅप डावनलोड करचो पडटलो. तेच बरोबर पंजाब नॅशनल बँक, एसबीआय, येस बँक आनी जम्मू-काश्मीर बँके कडल्यान ऑफलायन नोंदणी करूं येता.
प्रवास करपाचे दोन मार्ग
पहलगाम मार्गः ह्या मार्गातल्यान गुहेंत पावपाक 3 दीस लागतात, पूण हो मार्ग सोंपो आसा. प्रवासांत खर चडटी ना. पहलगामा सावन थारपाची पयलीं सुवात चंदनवाडी बेस कॅम्पा पसून 16 किमी अंतराचेर आसा. हांगाच्यान चडपाक सुरवात जाता. तीन किलोमीटर चडून गेले उपरांत पिसू टॉपाचेर पावता. हांगाच्यान चलत प्रवास करून सांजवेळार शेषनाग पावतात. हो प्रवास सुमार 9 किमीचो आसा. दुसऱ्या दिसा शेषनागांतल्यान प्रवासी पंचतरणीक वतात. शेषनाग सावन 14 किमी. अंतराचेर आसा. पंचतरणी सावन फकत 6 किमी अंतराचेर ही गुहा.
बालटाल मार्ग: वेळ थोडो आसल्यार बाबा अमरनाथ दर्शना खातीर बालटाल मार्गातल्यान वचूंक मेळटा. फकत 14 किमी चडाय काडची पडटा. ह्या मार्गांत अरुंद मार्ग आनी धोक्याची ओल्ता आसात.
6 लाख प्रवाशांच्या प्रमाण तयारी सुरू
फाटले फावट सुमार 4.50 लाख भक्त आयिल्ले. हे खेपे स लाख प्रवासी येवपाची शक्यताय आसा. हो प्रवास थोडोच काळाचो आसून तातूंत गर्दी जातली, देखून आनीक वेवस्था सुरू आसा. मार्गाचेर जेवण, थांबप आनी भलायकी तपासणेची वेवस्था आसतली. ऑक्सिजन बूथ, आयसीयू बेड, एक्स- रे, सोनोग्राफी मशीन आनी लिक्विड ऑक्सिजन प्लांट आशिल्ल्या दोन कॅम्प हॉस्पिटलांची उबारणी तयारी सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
