भांगरभूंय | प्रतिनिधी
नवी दिल्ली, खबरां संस्था ः वाणिज्य आनी उद्देग मंत्रालयान सगळ्या ई-कॉमर्स कंपनींक तांच्या संकेतथळा वयल्यान आनी प्लॅटफॉर्मावयल्यान ‘हेल्थ ड्रिंक्स’ ह्या वर्गांतल्यान बोर्नविटा सयत सगळी पेयां काडून उडोवपाक सांगलां. मंत्रालयान एके अधिसुचोवणेंत म्हणलां, नॅशनल कमिशन फॉर प्रोटेक्शन ऑफ चाइल्ड राइट्सच्या कायदेशीर संस्थेच्या चवकशेंत ‘हेल्थ ड्रिंकची व्याख्या ना’ अशें दिसून आयलां.
हाचे आदीं 2 एप्रीलाक भारतीय अन्न सुरक्षा आनी मानक प्राधिकरणान (FSSAI) सगल्या ई-कॉमर्स कंपनींक तांच्या संकेतथळार विकपाक येवपी खाद्य पदार्थांक योग्य वर्गांत दवरपाक सांगिल्लें. खंयच्याय पेयाची विक्री वाडोवपा खातीर हेल्थ ड्रिंक आनी एनर्जी ड्रिंक ह्या उतरांचो गैरवापर करचो न्हय अशेंय प्राधिकरणान सांगिल्लें.
नॅशनल कमिशन फॉर प्रोटेक्शन ऑफ चाइल्ड रायट्स (NCPCR) हांणी फाटल्या वर्सा बोर्नविटाचे उत्पादन कंपनी मोंडेलेज इंटरनॅशनल इंडिया लिमिटेडाक नोटीस धाडिल्ली. ह्या उत्पादनांत साकर चड आशिल्ल्याची कागाळी आसात अशें तातूंत म्हणलां. कांय घटक आसात, जाका लागून भुरग्यांचे भलायकेक त्रास जावं येता. देखून कंपनीन सगळ्यो चुकीच्यो जायराती, पॅकेजींग आनी उत्पादन लेबलांचो नियाळ घेवचो आनी फाटीं घेवचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
