भांगरभूंय | प्रतिनिधी
अयोध्येंतल्या रामलल्ला देवळांत काल शुक्रारा रामलल्लाच्या सूर्यतिलकाची यशस्वी चांचणी घेतली. हारशांतल्यान सुर्याचीं किरणां देवाच्या कपलाचेर पडटालीं.
सुर्यतिलकाच्या एक मिनीट १९ सेकंदाच्या व्हिडियोंत रामलल्लाचे मुख्य पुजारी आचार्य सत्येंद्र दास आरती करतना दिसतात. तेच वेळार सुर्याचीं किरणां रामलल्लांच्या कपलाचेर तिलक करतात. १७ एप्रीलाक रामनमी निमतीन दनपरां १२ वरांचेर रामलल्लाचो सुर्यतिलक जातलो.
आचार्य सत्येंद्र दास हांणी सांगलें, रामजल्माच्या वेळार सुर्य एक म्हयनो अयोध्येंत राविल्ले. त्रेतायुगांतली ही घडणूक. तें दृश्य आतां कलियुगांतूय साकार जातलें. शास्त्रज्ञांनी जे यत्न केल्यात ते सामके तुस्त करी सारके. सूर्यतिलकाचो देखाव अजाप करपा सारको आसलो.
आयआयटी रुरकीच्या सेंट्रल बिल्डिंग रिसर्च इन्स्टिट्यूटान (सीबीआरआय) ही प्रणाली तयार केल्या. प्रकल्प शास्त्रज्ञ देवदत्त घोष हांच्या मतान, हें सूर्याचो मार्ग बदलपाच्या तत्वांचेर आदारीत आसा. तातूंत रिफ्लेक्टर, 2 हारसे, 3 लेन्स आसात आनी पितळेच्या पायपा वरवीं किरण कपलाचेर घाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
