भांगरभूंय | प्रतिनिधी
-राज्यांतल्या पुलिसां मुखार मतदानाच्या हक्का विशीं समस्या
म्हापशेंः पुलीस नोडल अधिकारी आशिल्ल्या अधिक्षका वरवीं आयिल्ल्या मतदानाच्या बॅलेट पेपरा संबंदीत फॉर्म 12 डी हो पुलिसांचो अर्ज मतदारसंघा प्रमाण निर्वाचन अधिकारी स्विकारतात. अंदूं पयलेचे खेपे वेंचणूक अधिकाऱ्यांनी बॅलेट पेपराचे बाबतींत नेम लागू केला. अर्ज सादर करपाची मुजत उणी आशिल्ल्यान हो बॅलेट पेपराचे बाबतींत नेम लागू केल्लो आसून अर्ज सादर करपाची मुजत उणी आशिल्ल्यान सध्या राज्यांतल्या पुलिसां मुखार मतदानाच्या हक्का विशीं व्हड समस्या निर्माण जाल्या.
उत्तर आनी दक्षीण गोंयांत 31 मुखेल आनी हेर पुलीस स्टेशनां आनी विभाग मेळून सुमार 15 हजार कर्मचारी आसात. ह्या कर्मचाऱ्यांक बॅलेट पेपर वरवीं लोकसभा वेंचणुकेंत मतदान करपाचे आशिल्ल्यान संबंदींत पुलीस अधिक्षक कार्यालया वरवीं (नोडल अधिकारी) फॉर्म 12 डी हो अर्ज पुलिसांक भरून मतदारसंघा प्रमाण निर्वाचन अधिकाऱ्यां कडेन सादर करचो, अशें बार्देस वेंचणूक अधिकाऱ्यांनी संबंदींत निर्वाचन अधिकाऱ्यांक आदेश दिल्यात. ताका लागून पुलीस स्टेशना वरवीं कर्मचाऱ्यांचे सादर जावपी अर्ज निर्वाचन अधिकाऱ्यां कडल्यान न्हयकारपाचो प्रकार सुरू आसा.
फॉर्म 12 डी अर्ज भरून निर्वाचन अधिकाऱ्यां कडेन सादर करपाची निमाणी तारीख 18 एप्रील आसा. ते प्रमाण संबंदींत पुलीस कर्मचाऱ्यांक वेंचणूक अधिकाऱ्यां कडल्यान बॅलेट पेपर दितले.
पूण राज्यांतल्या वाळपय, काणकोण, सांगें सारक्या वाठारांतले पुलीस स्टेशन आनी विभागांतल्या कर्मचाऱ्यांचे फॉर्म 12 डी अर्ज संबंदींत पुलीस अधिक्षकां कडेन धाडपा खातीर फावोसो वेळ नाशिल्ल्यान आतां पुलिसांक धांवपळ करची पडटली.
हे अर्ज पुलीस अधिक्षक कार्यालया वरवीं संबंदींत निर्वाचन अधिकाऱ्यां कडेन वेळांत दिवप शक्य जाले ना जाल्यार पुलिसांक हे खेपे मतदाना पसून वंचीत रावचे पडटलें. ताका लागून ह्यो अटी नेमांच्या बाबतींत पुलीस खात्यान वेंचणूक अधिकाऱ्यां वरवीं उपाय काडचो, अशी मागणी पुलिसांची आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
