भांगरभूंय | प्रतिनिधी
दिल्ली कॅपिटल्सान इंडीयन प्रिमीयर लिगेच्या (आयपीएल) इतिहासांत लखनौ सुपर जायण्ट्सा आड पयलें जैत जोडलें. अंदूंच्या हंगामांतले 26वे मॅचींत दिल्ली कॅपिटल्सान लखनौ सुपर जायण्ट्साक 6 विकेटींनी हारयलो. दिल्ली कॅपिटल्सान अंदूं सेगीत दोन हारी उपरांत पयलें जैत जोडलें, जाल्यार लखनौ सेगीत तीन जैतां जोडल्या उपरांत पयले हारीक तोंड दिवचें पडलें.
लखनौन पयलीं बॅटींग करतना 20 ओव्हरींनी 7 विकेटी व्हगडावन 167 धांवड्यो केल्यो. ताका जाप दितना दिल्ली कॅपिटल्सान 18.1 ओव्हरींनी 4 विकेटी व्हगडावन 170 धांवड्यो करून जैत जोडलें.
दिल्ली कॅपिटल्सा वतीन पदार्पण करपी जॅक फ्रेजर-मॅगर्कान 35 बॉलांनी 55 धांवड्यांची खेळी केली. जाल्यार मुखेली ऋषभ पंतान 41 धांवड्यांचें योगदान दिलें.
लखनौ सुपर जायण्ट्सा वतीन रवी बिश्नोईन दोन विकेटी घेतल्यो. नवीन उल हक आनी यश ठाकूर हांकां एकेक विकेट फावो जाली. ह्या जैता उपरांत दिल्ली कॅपिटल्साचे 6 मॅचींतल्यान चार गूण जाल्यात आनी तो गुणतकट्यांत णववे सुवातेर आसा. दुसरे वटेन लखनौ सुपर जायण्ट्साचे पांच मॅचींतल्यान स गूण आसात आनी तो चवथे सुवातेर कायम आसा.
ते आदीं लखनौ सुपर जायण्ट्सान टॉस जिखून पयलीं बॅटींग करपाचो निर्णय घेतलो. ओपनर क्विंटन डी कॉक आनी लोकेश राहुल हाणें सादूरतायेन सुरवात केली. दोगांयनी पयले विकेटी खातीर 28 धांवड्यांची भागिदारी केली. डीकॉकान बाद जावचे पयलीं 13 बॉलांनी चार चवक्यांचे मजतीन 19 धांवड्यो केल्यो. ते उपरांत देवदत्त पडिक्कल (3) रोखडोच बाद जालो. 8वे ओव्हरींत चायनामॅन बॉलर कुलदीप यादवान लखनौक दोन धपके दिले. ताणें सेगीत दोन बॉलांचेर मार्कस स्टोयनीस (8) आनी निकोलस पुरन (0) हाका बाद केलो.
राहुलान कांय वगत मेरेन एक बाजू सांबाळून धरपाचो यत्न केलो. पूण, तोय लेगीत कुलदीपाच्या स्पिनाच्या जाळांत घुस्पलो. राहुलान 22 बॉलांनी पांच चवके आनी एक सक्याचे मजतीन 39 धांवड्यो केल्यो.
ते उपरांत ईशांत शर्मान दीपक हुड्डाक बाद केलो. डॅव्हिड वॉर्नरान ताची कॅच धरली. दीपकान 13 बॉलांनी 10 चवके मारले. ते उपरांत मुकेश कुमारान कृणाल पांड्याक (3) तंबूंत धाडलो.
लखौन एका वेळार 94 धांवड्यांचेर 7 विकेटी वगडायिल्ल्यो. पूण, आयुष बदोनीन लखनौक थाकाय दिली. ताणें अरशद खाना (20) वांगडा मेळून स्कोर 167 मेरेन पावयलो. आयुष आनी अरशद हांणी आठवे विकेटी खातीर 73 धांवड्यांची भागिदारी केली. 31 बॉलांनी अर्द शेंकडो पुर्ण करपी आयुष बदोनीन 35 बॉलांनी पांच चवके आनी एका सक्याचे मजतीन 55 धांवड्यो केल्यो.
दिल्ली कॅपिटल्सा वतीन कुलदीप यादवान 3 विकेटी घेतल्यो, ताचे खेरीत खलील अहमदान 2 जाल्यार इशांत शर्मा आनी मुकेश कुमार हांकां दरेकी एक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.