भांगरभूंय | प्रतिनिधी
पाटणा, खबरां संस्था ः बायलेच्या घरच्यां कडल्यान भुरग्यां खातीर पयशे मागप हो हुंड्याचो वा छळ करपाचो प्रकार न्हय असो निकाल पाटणा उच्च न्यायालयाचे न्या. बिबेक चौधरीच्या खंडपिठान 23 मार्चाक दिलो. तशेंच ह्या प्रकरणांत आरोपी नरेश पंडित हांचे आड दाखल केल्लो गुन्यांव फाटीं घेवचो असो निर्देश न्यायालयान दिला.
नरेश पंडिताचें लग्न श्रीजन देवी कडेन 1994 वर्सा जालें. तांकां 2001 वर्सा तिसरें भुरगें जालें. ही धूव जल्माक आयले उपरांत तीन वर्सां उपरांत श्रीजन देवीन 16 जून 2004 दिसा आपल्या घोवा आड गुन्यांव दाखल केलो. घोव चलये खातीर आपल्या बापाय कडेन 10 हजार रुपया मागता आनी ते खातीर म्हजो छळ करता अशी कागाळ बायलेन केल्ली.
2016 वर्सा दलसिंगसराय हांगाच्या सत्र न्यायालयाच्या न्यायिक दंडाधिकाऱ्यान आरोपी घोवाक आनी हेरांक भारतीय दंड संहितेच्या कलम 498- अ खाला लग्न उपरांत छळ करपा खातीर ख्यास्त फर्मायली. सगल्या आरोपींक दंडा वांगडाच तीन वर्सां बंदखणीची ख्यास्त फर्मायली. नरेशाक हुंड्याची मागणी केल्ल्यान एक वर्स चड ख्यास्त फर्मायली. 2021 वर्सा नरेशान अपील दाखल केल्लें, पूण समस्तीपूर उच्च न्यायालयाच्या अतिरिक्त न्यायाधीशान तें न्हयकारलें.
हे प्रकरण उच्च न्यायालयांत पावले. न्यायाधीश चौधरी हांणी ह्या प्रकरणा संबंदीत सगळ्यो गजाली तपासल्या. नरेशान चलयेची जतनाय घेवपा खातीर बायलेच्या घरच्यां कडल्यान पयशे मागिल्ले अशें सांगलें. मजती खातीर मागिल्ले पयशे हुंड्याच्या कायद्या खाला येवंक शकनात. हो निर्णय दितना उच्च न्यायालयान सत्र न्यायालयाच्या निर्णयाक कुशीक दवरून नरेशाक दिल्ली ख्यास्त माफ केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
