भांगरभूंय | प्रतिनिधी
पणजी: रायबंदरा सुरू आसपी स्मार्ट सिटीचीं 6 टप्प्यांतलीं कामां 90 टक्के पुराय जाल्ल्याची म्हायती इमॅजीन पणजी स्मार्ट सिटी डेव्हलपमेंट लिमिटेड हांणी दिली. ह्या कामांत सिवरेजीचें उदक आनी उदका पायप लायनी घालप, मेनहोल बांदप, रस्ते बांदणी, हार्डस्केपींग आनी स्टॉर्म वॉटर ड्रेनेज अशा कामांचो आस्पाव आसा.
मेळिल्ले म्हायती प्रमाण, रायबंदरा स्मार्ट सिटी खाला वट्ट 5232 मिटराचे रस्ते करपाचे आसात. हातूंतले 3862 मिटर म्हणल्यार 74 टक्के रस्त्यांचें काम पुराय जालां. वट्ट 9647 मिटर सिवरेजीचे पायप लायनी घालतले. हातूंतले 7768 मिटर (80 टक्के) काम पुराय जालां. तशेंच 289 तले 216 मॅनहोल (75) टक्के बांदून पुराय जाल्यात. तशेंच 5235 मिटर लांबायेच्यो उदका पायप लायनी घालपाचें काम सुरू आसा.
तशेंच 4212 (80 टक्के) वाहिन्या घालपाचें काम पुराय जाला. 9647 लांबायेचे स्टॉर्म वॉटर ड्रेनेज बांदपाचें काम सुरू आसा.
मजगतीं, स्मार्ट सिटींच्या कामांक लागून थळाव्याक जायते म्हयने त्रास सोंसचो पडलो. एकाच वेळार बंद केल्ले रस्ते, येरादारीची कोंयडी, कामांक लागून जावपी धुल्ल प्रदुशण हाका लागून लोकांच्या भलायकेचेर परिणाम जावपाची शक्यताय आसा. कांय दिसां पयलीं उच्च न्यायालयान हाची दखल घेवन न्यायमूर्तींनी स्मार्ट सिटीच्या कामांची प्रत्यक्ष पळोवणी केली. स्मार्ट सिटीचीं कामां पुराय करपाची मुजत 31 मे मेरेन आसा.
सांतइनेजांतल्या 61 टक्के रस्त्यांची पुनर्बांदणी
पणजे सांतइनेज वाठारांतल्या 61 टक्के रस्त्यांची पुनर्बांदणी केल्या. ह्या वाठारांत वट्ट 2985 मिटर लांबायेचें रस्ते उबारपाचें लक्ष आसा. हातूंतल्या 1945 मिटर लांबायेचे बांदिल्ल्याचे स्मार्ट सिटी प्रकल्पाच्या अधिकाऱ्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
